India aiawh tur Jeremy leh Jacob

Mizo lifter pahnih Jeremy Lalrinnunga leh Jacob Vanlaltluanga te chu India aiawha 2019 Commonwealth Senior Men & Women leh Junior Commonwealth Men & Women Weightlifting Championships hma-chhawn tura thlan an ni. Inelna hi July 6-14 chhungin Apia, Samoa-ah neih a ni ang.

Govt. Complex rawlthar Jeremy hian 67kg-ah a chawi ang. Tun ṭumah hian senior category-ah a chawi dawn a, junior category-ah a la tel theih tho avangin inelna pahnihah a tel kawp dawn a ni. Jeremy hian June 6 leh July 5 chhungin Melbourne, Australia-ah hian inpuahchahna an nei ang a, Commonwealth Weightlifting C'ships neihna tur Apia, Samoa a pan nghal ang. Inelna hi 2020 Tokyo Olympic qualification atan hman nghal tur a ni bawk.

Govt. Complex rawlthar tho Jacob-a pawh India aiawha junior (men) leh youth (boys) hmachhawn tura thlan a ni a, 61kg category-ah a chawi thung ang. Jacob-a hi chuan India ramah inpuahchahna an nei chhunzawm dawn a, July 5 hian New Delhi aṭangin Samoa an pan thung dawn a ni.

Weight lifter pahnih hi SYS coach Malsawma Khiangte hnuaiah an naupan laiin an inzir a, hemi hnu hian Army Boys, Pune-ah awm chhoin tun dinhmun hi an thleng a ni.