Petr Cech tan hun hnuhnung

"Match hnuhnung ber khelh zawh hnuah ka hma hun tur ka tichiang ang," tiin Petr Cech-a'n May 22 khan a sawi nawn leh a, zanina Arsenal leh Chelsea ten Europa League final an khelh tur hi player a nih chhunga a match hnuhnung ber a ni dawn.

Kum 37 mi Cech hian inkhelh a chawlhsan hnuah hun ropui a tawn tawhna Chelsea lamah hna thawk turin a kir leh ngei dawna ngaih a ni - Premier League nomawi vawi li a chawipui tawh Blues nen thawm an nei leh hi a mak hran lo. Mahse, inkhel pawimawh tak an neih hma lawka a club hlui nen boruak an nei hi Arsenal fans lamin an ngaithiam lo a, Europe League lama an chhawr rim keeper hi final khel lo tura duhtu an tam hle. Thutlukna chu manager Unai Emery siam tur a ni ang.

Czech Republic international hlui Cech chuan, "Thu leng vel awm mah se tun hma lama ka thutlukna kha a la ngai reng, match hnuhnung ber khelh zawh hnuah hma hun ka ti chiang chauh ang. Tuna ka ngaihtuah awmchhun chu Europa League final khelh a ni," a ti.
League lama Cech nek chhuaktu Bernd Leno pawh a ṭawng chhuak, German keeper hian tawnhriat ngah Cech chu zah hle mah se inkhel tura hun ṭha a nei a nih phawt chuan a hnar loh tur thu a sawi - a inringtawk hle.

Gunners keeper Leno chuan, "Player puitling ka ni a, a rem a nih phawt chuan inkhelh zel ka duh. A bik takin final khel lo tura ngaihdan neih chu thil tih chi a ni lo hial zawk," tiin Arsenal tana inkhel pawimawh taka inlan a châk thu a lo sawi ve bawk.