Nadal leh Djokovic an chak

French Open khelh mekah Rafael Nadal leh Novak Djokovic ten Thawhṭanni zan khan an match hmasa ber an khel a, champion tura rinkai pahnih hian harsatna tawk loin second round an inhlangkai.

Roland Garros, Paris-a inkhelah vawi 11 champion tawh Nadal-a'n German player lakah zahngaihna a lantir lo, darkar khat leh minute 57 chhungin Yannick Hanfmann chu 6-2, 6-1, 6-3 in a sawp.

Spanish tlangval Nadal hian Roland Garros title hi a la thei a nih chuan Grand Slam mala vawi 12 champion thei hmasa record a siam thar dawn, a match lehpekah chuan Yannick Maden nen an inhmachhawn leh ang.

Inkhel dangah seeded pakhatna Djokovic chuan Hubert Hurkacz 6-4, 6-2, 6-2 in a sawp ve thung a, Serbian tlangval hian second round-ah Henri Laaksonen a hmachhawn leh dawn a ni.

World number 1 Djokovic hian Australian Open, Wimbledon leh US Open nomawi a kawl khawm mek a, Paris-ah hian hlawhtlinna a chang leh a nih chuan tennis a khelh hun chhunga a vawi hnih nan Grand Slam title pali chu a vawi hnih nan a rualin a kawl khawm ang.