June 27 thleng session-in a awh dawn

June 12, 2019 aṭanga 8th Mizoram Legislative Assembly session ṭum thumna neih tur atan speaker Lalrinliana Sailo kaihhruai Business Advisory Committee (BAC) chuan programme an duang tawh a, June 27 thleng session hi neih turin an duang.

BAC-in programme a duan dan chuan session ṭan nia session hnuhnung ber leh session neih tur inkara MLA nunna chante sunna hun hman a ni ang. A ni hnihnaah finance changtu chief minister Zoramthanga'n kum 2019-2020 atana budget puitling a pharh dawn a ni.

June 15 leh 16 chu Inrinni leh Pathianni a nih avangin chawlh a ni ang a, June 17 - 26 (June 21 tiam lohin) chhung zawng chu zawhna leh chhanna hun hman zawhah demand sawihoa pass tum a ni dawn a ni. June 21 chu Zirtawpni a nih angin zawhna leh chhanna hman a nih zawhah private member resolution lut a awm chuan sawiho a ni ang.

Session tawp ni June 27-ah chuan zawhna leh chhanna hun hman a nih zawhah sorkar thil pawimawh ngaihtuah tur a awm a nih chuan ngaihtuah a ni ang.