Xavi-a'n Al Sadd enkawl dawn

Barcelona legend Xavi chuan inkhelh a chawlhsan thu a puan hnu lawkah hna thar a nei nghal a, footballer a nihna anga a hun tawp hmanna Al Sadd SC-ah coach a ni dawn. 

Kum 39 mi midfielder hian 2015 khan Barcelona chhuahsanin Al Sadd hi a zawm a, match 115 khelhsakin nomawi pali a chawi a, heng zingah hian season liam taa league champion an nih chu a tel.

Xavi hian season tawp dawn khan inkhelh a chawlhsan thu a puang a, Qatar chhuahsan zui mai tura ngaih a nih laiin coach ni chhunzawm turin a cham dawn ta zawk a ni - kum hnih chhung atan contract a ziak. 

Barcelona tana nomawi chawi theih zawng zawng chawitu Xavi chuan, "Johan Cruyff leh La Masia hnuaia kan zir ang hi ka coaching kalphung chu a ni a, mi zawng zawngin an ngainat possession football pholan hi ka duh ber," a ti a, Al Sadd a khelhtir dan tur a sawi.