Transfer bazar-ah Spurs an pawr!

Stadium thar an nei tawh a, Champions League final an lut tawh bawk a, Tottenham Hotspur an pawr thar hle -  Real Betis midfielder Giovani Lo Celso chu lakluh tumin pound maktaduai 53-in an dawr!

Mahse, kum 23 mi Argentine midfielder hi a contract-a a release clause hi pound maktaduai 88 a tling a, Betis hian heti zat 'hnaih' tal sum an phut niin an sawi. Hei mai hi a la ni lo. Lo Celso hi Premier League club dang pawhin an duh ve nia sawi thawm a awm a, London club tan chang tur chuan pound maktaduai 53 aia tam phawrh ngei a ngai dawn niin a lang. Hetihrual hian Tottenham hi Champions League final khel tur club an ni a, Lo Celso hian pan a hreh lo ang. 

Spurs hian stadium thar an sak avangin January 2018-a pound maktaduai 23-a Lucas Moura an lakluh hnuah sum an seng leh tawh lo a, coach Mauricio Pochettino chuan an kal dan ngaia kal reng chuan hlawhtlinna beisei chi a nih loh thu a lo 
sawi tawh. 

Tottenham-in player an lei to ber chu August 2017-a pound maktaduai 42-a Davinson Sanchez an lei kha a ni a, Lo Celso hi an lalut a nih chuan Ajax centre back hlui man hi a khum dawn tihna a ni. Giovani Lo Celso hian season hman zawh takah khan Real Betis tan match 45 khelin goal 16 a khung a, assist vawi ruk a nei bawk. Copa America khel tur Argentina squad-ah pawh telh a ni.