Raptors hmachhawn tur zingah Durant a tel

Zirtawpni zing dar 6:30 hian NBA Finals khelh ṭan a ni dawn a, game 1 khelhna tur hmun Toronto Raptors khelmual Scotiabank Arena, Toronto pana zin chhuak Golden State Warriors team zingah Kevin Durant a tel.

American forward Durant hi Houston Rockets nen Western Conference semifinal an khelh ṭumin a inhliam a, a chawn hliam vang hian tun hnai GSW match hnuhnung pangaah a inlan thei lo. NBA Finals game 1-ah chuan a inlan a la beiseiawm chiah loh, mahse game 2 pawh Toronto-a khelh zui tur a nih avangin a zin ve nghal a ni.

Golden State coach Steve Kerr chuan, "Thil thleng thei tam tak a awm a, mikhual kan nih dawn avangin a ṭha thei ang bera kan inrem a ngai dawn. Kevin a zin ve thei a, ani hi a inlan thei a nih chuan a ṭangkai thei ang bera hman kan tum ang," a ti. Warriors hian Stephen Curry, Klay Thompson leh Draymond Green te an neih hi thlamuanpui tham an ni. Mahse, an khingpui tur hi Milwaukee Bucks hneh thei Raptors an ni - anni hian Kawhi Leonard, Pascal Siakam leh Kyle Lowry an nei ve bawk, chak lo turah an indahsa bik ngawt lo ang.