Champion lai Halep leh Osaka te an chak

French Open hmeichhe singles champion lai Simoma Halep leh world number 1 Naomi Osaka ten Thawhlehni zan khan an match hmasa ber an khel a, player langsar pahnih hian hnehna changin second round an in vaw kai.

Roland Garros khelhna zinga an chhuanvawr Philippe Chatrier-ah Halep hian world number 47 Ajla Tomljanovic chu 6-2, 3-6, 6-1 in a hneh. Romanian nula hian second round-ah chuan world number 87 Magda Linette a hmachhawn leh ang.

Seeded pathumna Halep-i'n kuminah beisei a la pha tawk lo a, season dang anga result ṭha a neihna clay court-ah pawh nomawi a chawi hleithei lo - Paris khawpui hi nikuma a hlawhtlin tawhna a nih avangin beisei a nei sang.

Japanese nula Osaka-i'n tennis a khelh hun chhunga a vawi khat nen seeded pakhatna nichungin Grand Slam a khel. Osaka hian Anna Karolina Schmiedlova lakah set hmasa berah game la miah lo mah se 0-6, 7-6 (7-4), 6-1 in a tho chhuak.

US Open leh Australian Open champion Osaka hian a match lehpekah Victoria Azarenka a hmachhawn dawn. Azarenka-i'n 2017 French Open champion Jelena Ostapenko chu 6-4, 7-6 (7-4) in a hneh.

Inkhel dangah seeded 14-na Madison Keys chuan Evgeniya Rodina 6-1, 6-2 in a hneh a, seeded 11-na Aryna Sabalenka pawhin Grand Slam final khel tawh Dominika Cibulkova chu 7-5, 6-1 in a lo hneh ve bawk a ni.