Cricket World Cup kan nghak chhuak ta

Cricket inelna ngaihhlut ber Cricket World Cup chu vawiin tlai dar 3:00 aṭangin khelh ṭan a ni dawn. Oval, London-ah inelna thlengtu England leh South Africa an inhmachhawn ang.

England leh Wales-a khelh tur inelnaah hian team 10 - South Africa, India, Australia, England, New Zealand, Pakistan, Bangladesh, Sri Lanka, Afghanistan leh West Indies an tel dawn. England-in ṭum thum zet final lut tawh mah se nomawi an la chawi lo a, an khingpui tur South Africa pawh hi team ṭha tak a ni nachungin final an la lut lo.

Champion tur?
Cricket World Cup-ah hian champion lai chu Australia an ni a, nomawi an chawi aṭangin kum li a tling leh tawh. ICC ODI ranking chu tehfung ṭha tak a ni thei ang. England hian ranking-ah pakhatna dinhmun an hauh mek a, India chu an hnuai chiahah awmin an pahnih hian final-ah inhmachhawn se 'dream final' tih theih tur a ni.

England leh India an ṭha a, chutihrualin champion lai Australia hming sawi hmaih a thiang lo. Baggy Greens hi an tlak hniam hnuah lang khawpin hma an sawn leh a, ranking-ah pangana ni pha chauh mah se a sang pali zinga an tel loh chuan 'upset' a tih theih ang. Opening match khel tur South Africa pawh hi stage sang chinah beisei an pha ṭhin lo a, group stage-ah erawh team ṭha ber zinga mi an ni leh dawn.

World Cup chinah chuan Pakistan pawh Pakistan an nihna a lang lehin a rinawm a, warm up match-a India sawptu New Zealand pawhin nomawi an beisei ang.

Run siam tam tur England
England hian World Cup inpuahchah nan Australia chu run 12 leka an hneh loh hnuin Afghanistan chu wicket kuain an sawp. 

World Cup hnuhnung ber thlirlet chuan England hian group stage an paltlang lo a, Scotland leh Afghanistan te chiah an hneh. Hemi hnu hian nasa taka insiamṭhain ṭum li zet run 400 an vawi kai a, England run siam hnem 10 zinga pakua chu 2015 World Cup hnua thleng a ni. 

Batting hi an ṭhatna a ni a, England batsman Joe Root, Jonny Bairstow, Jason Roy, Eoin Morgan leh Jos Buttler te hi team tinin an kawl châk turte an ni a, khawvela ODI batsman ṭha sawi chuan wicketkeeper Buttler hmaih a thiang lo.

England tana bat hmasa tute an chesual a nih pawhin batting order hnuai lam an la rintlak. Fast-medium pace bowler Chris Woakes chuan ama pualin Test century a nei tawh a, ODI lamah pawh thi loin run 95 a siam tawh. Woakes hi batting order-ah pariatna chung lamah a awm meuh loh avangin a record hian batting lama England ṭhatzia a pholang. 

Captain Eoin Morgan chuan, "Warm up match hi khel lo pawh ni ila World Cup khel tur hian kan inringtawk. Afghanistan kan hneh danah khan kan thawhrimna a lang," tiin inelna hmachhawn tura an inpeih thu a sawi.

Beisei pha ṭhin lo
South Africa hi World Cup final la lut lo zingah chuan team ṭha ber an ni a, inelna ṭan hmain rinkai nih ṭumte nei mah se inelna tak takah beisei an pha ṭhin lo. 

Nikum kumtir aṭang khan South Africa hian ṭum thum chauh run 300 an vaw kai a, an khingpui tur England erawhin kumin May thla chhung ringawtin vawi li zet run 300 an vawi kai thung.

Amaherawhchu South Africa bowling lam hi an chhuanawm viau. Spinner Imran Tahir leh fast bowler Kagiso Rabada te chu bowling ranking-ah palina leh pangana an ni pha. Opening match-ah erawh an ṭhat dan tur berin an inlan thei dawn lo -  head coach Ottis Gibson chuan pace bowler Dale Steyn chu inhliam vangin England a hmachhawn theih loh tur thu a tichiang. 

Team dinhmun thlir chuan England dinhmun a ṭha a, opening match boruak sangah erawh engpawh thleng thei a ni.