Jeremy leh Siami hnenah thilpek

Mizoram sorkar Sports & Youth Services Department chuan khawvel leh Asia huapa hming langpha Jeremy Lalrinnunga leh Lalremsiami Hmar te hnenah vawiin tlai dar 2:00 hian Chanmari YMA Hall-ah thilpek an hlan dawn.

Govt. Complex rawlthar Jeremy hian 2018 Summer Youth Olympics-ah gold medal a lak avangin nuai 15 pek a ni dawn. Hockey khel thiam Siami hnenah nuai 20 hlan a ni thung ang. Kolasib tleirawl hian Asian Games 2018-ah India silver a lakpui avangin nuai 10 pek a ni a, nuai 10 dang hi Summer Youth Olympics-a pahnihna an nih vang a ni.

Thilpek hlan hunah hian Sports & Youth Services Deptt. leh Tourism & ICT Deptt. changtu minister Robert Romawia Royte chu khuallian a ni ang. Tourism Department chuan India ram aṭanga Youth Olympics-a gold la hmasa ber Jeremy hi vawiin hian brand ambassador atan an ruat nghal bawk ang.