Ramos-a'n China pan a duh

Real Madrid captain Sergio Ramos chuan free transfer-a Santiago Bernabeu chhuahsan a duh niin club president Florentino Perez chuan a sawi. 

Kum 33 mi centre back hian kum 2021 nipui thleng cham turin Real-ah hian contract a nei a, mahse Chinese Super League aṭanga sawmna a hmuh avangin Real hi chhuahsan a duh a ni. Perez hi Ramos leh a agent ten an hmu a, CSL club an hming tarlan loh chuan sum tam tham tak hlawh tura an sawm thu an hrilh - mahse league dan avangin transfer fee erawh an pe thei lo thung. 

Spanish radio station Onda Cero hnenah thu sawiin Perez chuan, "Ka office-ah min hmu turin an rawn kal a, sawmna duhawm tak an hmuh thu min hrilh. Hetih rual hian anmahni sawmtu club hian an ram lama an dan hmanlai avangin transfer fee an pe thei lo thung.
"Mahse, Ramos hnenah hian kan captain chu man nei loa kan chhuahtir ngawt theih loh thu ka hrilh a ni," a ti a, Spanish defender hma hun tur a chiang ta lo hle. 

Ramos hian kum 2005 khan Sevilla aṭangin Real hi a pan a, tun dinhmuna an player senior ber niin match 606 a khelh sak tawh a, defender ni siin goal 84 a khung sak bawk. Real tan hian La Liga-ah nomawi pali a chawi tawh a, Champions League-ah vawi li a champion bawk. Mahse, February-a Champions League last 16 aṭanga Ajax-in an hnawhchhuah hnu khan Ramos leh Perez hi an inhmuthiam lo niin sawi a awm. 

Ramos hian first leg-ah yellow card a hmu lui niin UEFA chuan an ngai a, chak chiang tawha inngai defender hian second leg-a hremna tawrh zawh a duh vang a ni - UEFA chuan match hnih a hrem phah a, an la tlawm zui!