Inter-in Spalletti an ban ta

Nimin khan Luciano Spalletti chu Inter Milan manager a nihna aṭanga ban fel a ni. Spalletti chhuah hmain Inter hian season thara an manager atan Antonio Conte chu an ruat fel der tawh.

Kum 60 mi Spalletti hian 2017 nipui lai khan AS Roma aṭangin Inter hi a pan a, a club hi a kum zawnin Champions League a khelhpui - season tharah pawh European football sang ber khel turin a hruai tling.

Tun kartir mai khan Spalletti-a'n a unaupa a chan a, ni hnih hnu lawkah Inter lamin an ban thu an puang hi a hun lo titu an tam hle. Inter chuan, "FC Inter­nazionale Milano chuan Luciano Spalletti hi kan first team head coach a ni tawh lo tih kan puang.

"Club tana Spalletti hnathawh ṭhatte kan hre reng a, theihnghilh a ni tawh lo ang. A hma hun lo kal zel tur atan duhsakna kan hlan," tiin an manager an mangṭhana thu an chhuah.

Inter hian Antonio Conte chu season thum atan inremna an neih pui tawh nia tarlan a ni a, vawiin hian puanzarna an neih a rinawm. Juventus leh Chelsea manager hlui hian coaching staff a thlak hlawk dawn - goalkeeping coach erawh a ngai a hmang dawn nia sawi a awm thung.