Europa League champion Chelsea

Baku-ah Chelsea-in Arsenal 4-1 in an sawp a, Maurizio Sarri hote Europa League-ah an champion. Nilaini zan inkhelah Blues tan Eden Hazard-a'n goal hnih khungin Olivier Giroud leh Pedro ten goal khat ve ve an khung bawk.

Unai Emery hote erawh an chak loh avangin season tharah Champions League an khel dawn lo a, Europa League-ah bawk an inlan dawn. Premier League aṭangin Manchester City, Liverpool, Chelsea leh Tottenham Hotpurs ten Champions League an khel ang a; Arsenal, Manchester United leh Wolverhampton Wanderers ten Europa League an khel ang.

Baku a fuh lo
Azerbaijan khawpui Baku hi London aṭanga mel 3,000 vel zeta hlaa awm a ni a, zin a awlsam lo. UK aṭangin 'direct flight' a awm lo a, inkhel en turten Turkey, Ukraine, Russia, Georgia emaw Belarus an tlawh kawi phawt a ngaih avangin nuam sain an zin lo. Hei vang hian supporter-te hi a sang rualin Baku an thleng lo a, 100 bi ang zawngin an thleng.

Kalna a harsat avangin ticket an hralh zo lo a, team pahnih ṭantute belhkhawm hi mi 5000 chuang awrh an ni a. Enna aṭanga khelmual a hlat avangin boruak a nung tawk lo, 'exhibition match' nen an khaikhin hial. TV aṭanga thlirtute pawhin camera angle a san avangin an sawisel tho bawk.

A goal lo
Final hmuhnawm hmuh châka kal khawmten an duh ang an hmu lo a, goal chance hmuh tur erawh a awm tho. Arsenal-in bul an ṭan ṭha zawk, keeper Kepa Arrizabalaga hnek per ṭhat loh chu Alexandre Lacazette-a'n goal zawnah a pet thei lo.

Lacazette hian keeper Kepa lakah penalty a beisei zui a, Italian referee Gianluca Rocchi-a'n penalty turah a ngai lo. Europa League-ah VAR hman a ni a, amaherawhchu thil thlen dan hi a chian loh avangin referee thutlukna a kaltlang. An khelh rei hnuah erawh Sarri hoten N'Golo Kante, Mateo Kovacic leh Jorginho te hmangin inkhel an thunun. Blues striker Oliver Giroud ball pet ṭha zet chu Arsenal keeper Petr Cech-a'n a dan sak a, goal lut loin first half a tawp.

Chelsea an thiam zawk
Arsenal-in Oliver Giroud hnawlin Lacazette an lalut a, an duhthlan sual rah final-ah an seng. Minute 49-naah Emerson-a cross chu Giroud-a'n goal kilah a tauh a, striker nazawng tan khung theih chi a ni lo.

Chelsea-in minute 60-naah Hazard-a ball pek chu vengtu nei lo Pedro-a'n goal kilah a dah. Arsenal tlarhnungin hotu an nei lo a, Gunners tlarhnung a pawp. Gunners defender Ainsley Maitland-Niles naupanna a lan a, minute 65-naah ṭul lo taka Giroud a tihtluk vangin penalty a chawi. Hazard rawn pen chhuakin keeper Cech bum nan a hmang.

Arsenal substitute Alex Iwobi-a'n minute 69-naah goal ropui khungin beiseina thar nei mah se final khel zinga thiam ber Hazard-a'n Gunners beiseina a titawp. Belgian forward leh Giroud ten wall pass hmangin Arsenal an ṭhiat a, Hazard-a'n minute72-naah chak nemnghehna goal a khung.

Arsenal leh Europa League
Arsenal-in Arsene Wenger hnawlin beiseina thar nen Unai Emery lalut mah se thil thar hmuh tur a awm lo. Tun hmaa Champions League khel ziah ṭhin club hian season hnih chhung Europa League an khel tawh a, season tharah pawh an khel leh dawn.

Unai Emery hoten anmahni chauh lo chu dem tur dang an nei lo. Europa League final-ah chak an phu lo a, league-ah palina china awm theihna hun ṭha nei mah se an hmang ṭangkai lo - Gunners hian an elpui dangte angin player an nei ṭha tawk lo. Arsenal hian April thla tawpah Leicester City an hneh lo a, UEL final-a penalty chawitu Maitland-Niles chu fimkhur loh vangin hnawhchhuah a ni - match pawimawhah an squad chhah tawk lohna a lang ṭhin. Gunners starting eleven-ah world class an awm ta meuh lo a, tun hmaa 'ber' ni pha Laurent Koscielny leh Mesut Ozil te pawh an vanglai a liam ta.

Gunners manager Unai Emery chuan, "Hlauhthawnna tur a awm lo a, hmabak êng tak kan nei a ni. Club lian kan ni a, Arsenal-a khel châk player ṭhahnem tak an awm," tiin hnualna tur a awm loh thu a sawi a, final bikah erawh Chelsea-in champion an phu thu a sawi.