Apuia a pui zual zel!
A hming chu Lalengmawia a ni a, 'Apui' tiin an ko ṭhin - Vaivakawn tlangval a ni a, Mizo naupang dang ang thoin kawngpui dung leh khelmual khu tak chu a inzirna ve mai a ni.
Chutihlai chu hmanni lawk kha a ni - ni e, hmanni lawk tak tak kha. October 17, 2000 khan Apuia hi a piang a, tunah chuan India jersey ha chungin ram tan a inlan ta.
Ningani zan khan India chuan friendly match-ah 1-1 in Oman an inhnehtawkpui a, Apuia'n inkhel bul ṭan lo mah se second half-ah luhtir a ni a, India game buai thlak danglamtu a ni.
India tan Lallianzuala Chhangte chu minute 79-naah luhtir a ni bawk a, Lunglei tlangval tan erawh danglamna thlen turin hun a tam tawk tawh lo.
4-3-3
India coach Igor Stimac-a'n team tenau hmachhawn chunga ranking lama hmasawn aiin team ṭha tum a thlang zawk a, kum 2021-a India match hmasa atan Oman leh UAE-a thlang.
Stimac-a'n a a hman uar leh sawi nasat 4-2-3-1 aiah 4-3-3 a thlang a, tlarhma laia khel tur a neih ṭhat loh avangin ATK Mohun Bagan tana mual sir lama khel ṭhin Manvir Singh chu a laiah dah a ni a, a sir aṭangin Ashique Kuruniyan leh Bipin Singh-ten an thlawp.
Midfield-a tlarhnung venpui turin Rowllin Borges chu a laiah dah a ni a, Manipur rawlthar pahnih Suresh Wangjam leh Jeakson Singh-ten an dinpui.
Tlarhnung laiah Chinglensana Singh leh Sandesh Jhingan an inkawp a, a sirah Ashutosh Mehta leh Akash Mishra-ten an dinpui a, regular keeper Gurpreet Singh Sandhu aiah Mumbai City tana season duhawm tak hmangtu Amrinder Singh thlan a ni.
Duhthlanna mak
Stimac-a'n player a koh dan aṭanga enin team thar din a tum tih a lang a, Oman lakah pawh squad-a enchhin phawt rinna a lian sa - hetihrual hian a thutlukna ṭhenkhatah mak tih tur a awm.
Ashique-a'n squad-a hmun a chang ringawt pawh thil mak a nih tawh laiin bul ṭantir a ni a, Suresh leh Jeakson-te hian ram tana an match hmasa bera bul ṭan nghal turin hna ropui an thawh sawi tur a awm lo.
Ram tana a vawi khat nana inlan ve tho zingah Ashutosh, Chinglensana, Bipin leh Mishra-ten bul an ṭan erawh ISL-a an khelh dan enin an phu thung.
Stimac-a thutlukna siam sual inkhel ṭantir aṭangin a lang nghal a, India-in midfield an thunun hneh miau loh avangin goal nawr an harsat a, an khel a 'pherh' hle.
Vanneihna
Oman tan Abdulaziz Al-Muqbali, Amjad Al Harthi leh Mohammed Al Ghafri-ten chance an nei nghal a, minute 26-naah Rowllin-a'n Al Maqbali a tih tluk avangin penalty a chawi zui.
Mahse, India vanneih zan a ni a, Oman number 9 Al-Muqbali penalty pet ṭha tawk lo chu Amrinder-a'n a dansak a, India an him.
Minute 42-naah erawh India-in goal an chhuah ta nge nge a, Zahir Al Aghbari-a shot naran tak chu Amrinder-a'n a man nghet thei lo a, a per lehlam chu Chinglensana chuan pet chhuak thei loin an lamah a ti lut.
Goal dang lut loin chawlhlawk hman a ni a, second half-ah India game a danglam sawt. Ashutosh-a'n Bipin tan a siamsak hnuah Manipur forward hian Manvir tan a thlawh lut ve leh a, Punjab striker hian ṭha zetin a tauh lut - India tan Amrinder-a'n goal an khung hnuah vawi hnih ngawt save ṭha zet a neih a ngai a, hun tawp thleng goal dang lut loin 1-1 in inkhel a tawp.
Danglamna Apuia
Indian Super League khelh zawh taka Emerging Player of the League-a thlan Apuia chu minute 46-naah luhtir a ni a, Vaivakawn rawlthar hian a tih tur tak tiin Oman game rang chhu chattu a ni a, ball nen a ding nghet a, tlarhnung leh midfield a thlun zawm ṭha hle.
Apuia chuan, "Ka football career-a ka tum ber pakhat chu ram tana inlan a ni a, ka tihlawhtling thei ta - Pathian hnenah lawmthu ka sawi takmeuh a ni. Ka rin aiin game a harsa a, Oman kha team ṭha tak an nih avangin an che rangin an chak a, ball min chuh zung zunga a, a awlsam lo hle.
"Mahse, hmasawn tur kan nih avangin khatiang ang game harsa khelh kha kan mamawh chu a ni," tiin Vanglaini a hrilh a, media leh fans tam takin an fak rawn chungin Apuia chuan, "Khel ṭha ka inti lo a, kha aia tam zawk ball chang thei ka la ni. Mahse, a vawi khatna chauh a ni a, hmasawn zel turah ka inngai," a ti!
Minute 79-naa luhtir Lallianzuala chuan, "Kha aia rei zawk kha khelh ka châk a, mahse, coach-in midang tan chance siam a duh avangin ka hrethiam viau tho. Ka duh aiin kan khel ṭha tawk lo a, second half erawh a zia hret - kan vannei a, kha aia ṭha zawka khel thei kan ni," tiin Vanglaini a hrilh ve bawk.
Inkhel Result
Oman 1 - 1 India
OMA: Chinglensana Singh 43' (OG)
IND: Manvir Singh 55'
March 29, Thawhṭanni Zan
United Arab Emirates 9:45 PM India
*Eurosport chu live-a inkhel pe chhuak tura ngaih ni mah se technical lama harsatna an tawh avangin Oman vs India hi television lamah live-in pekchhuah a ni lo.
*Player 10-in India tana an match hmasa ber an khel a; Suresh Wangjam, Akash Mishra, Bipin Singh, Jeakson Singh, Ashutosh Mehta, Mohammed Yasir, Ishan Pandita, Chinglensana Singh, Lalengmawia (Apuia) leh Mashoor Shereef-te an ni.