Womens Senior One Day Trophy Mizoram hmaah Odisha

India ram pum huap hmeichhe cricket inelna, Womens Senior One Day Trophy-ah Mizoram chuan pre quarterfinal an lut a, vawiin chawhma dar 9:00 hian Odisha nen an inhmachhawn ang. Inelna hi Saurashtra Cricket Association Stadium, Rajkot-ah neih tur a ni.
Board of Control for Cricket in India hnuaia inelna an hmachhawn tawhah chuan Mizoram thlen san ber ṭum a la ni a, mumang nuam leh hliawm taka an chen mekna aṭang hian harhchhuah an duh lo ang - an hmabak erawh a hautak tawh dawn.
Vawi nga chak
Mizoram hi plate group-ah - Sikkim, Manipur, Arunachal Pradesh, Pondicherry, Bihar leh Jammu and Kashmir te nen an awm khawm. March ruk an khelhah vawi nga hnehna an chang a, chak zat inangah Pondicherry nen an intawn ṭuma an chak avangin an tlang.
Cricket Association of Mizoram (CAM) hnuaiah Mizo hmeichhia ten mumal taka cricket an khelhna a la rei lo. Mahse, hun rei lote chhungin hmasawnna hmuh tur a awm. PC Vansangzuali, Julie Malsawmtluangi leh Lalrinawmi te chu team innghahna an ni phak.
Mizoram hian beisei an nei sang, amaherawhchu an khingpui tur Odisha hi Group A aṭanga tlang an ni. Hyderabad, Gujarat, Chhattisgarh leh Tripura te chunga awm thei an nih avangin CAM team tan hnehna chang tur chuan thapui thawh a ngai dawn.
Mizoram inringtawk
Mizoram manager Raj Kumar Joshi chuan, "Kan zin chhuah dawn khan rin hlawh tak chungin kan kal lo, mahse inelna neihna hmunah kan thil zir leh thiamte kha a takin kan lantir thei a, hei leh chen hi beisei aia sangin kan kal.
"Thlawptu kan nei ṭha hle a, Mizo mipui zawng zawngin min ṭan em em tih kan hria, an duh ang result neih ngei tumin theihtawp kan chhuah dawn," a tiin Vanglaini a hrilh a, ball hnuhnung ber thlengin theihtawp an chhuah tur thu a sawi bawk.
Womens Senior One Day Trophy-ah hian player malin match khatah Rs. 12,500 zel an hlawh. CAM chuan pre quarterfinal an luh avangin Mizoram team player leh coaching staff zawng zawng chu Rs 20,000 ṭheuh a pe dawn tih a lo puang tawh bawk a ni.