Vawiin I League Judgement Day Gokulam, Trau leh Churchill?

Tun season-ah I League match khat khelh hma bakah Gokulam Kerala FC, Churchill Brothers FC Goa leh Trau FC ten point 26 vek an hmu a, an la champion thei vek. 
Vawiin tlai dar 5:00 hian Kolkata-ah match hnih khelh a ni ang a, hemi zawh hian champion tur a chiang ang. Kishore Bharati Krirangan-ah Gokulam leh Trau te an inkhel ang a, Salt Lake Stadium-ah Churchill leh RoundGlass Punjab te an inkhel bawk ang.
Champion theih dan
Champion turin Gokulam Kerala dinhmun a ṭha ber. Kerala club hi head to head-ah Churchill Brothers aiin a ṭha zawk a, Trau an hneh a nih chuan an champion dawn. Gokulam hian phase 1-ah Churchill hi 3-2 in hneh lo mah se phase 2-ah 3-0 in an hneh let a, Manipur club an hneh thei a nih chuan a vawi khat nan I League nomawi an chawi ang.
Chutihrualin Gokulam khingpui tur Trau hi champion beiseina nei tho an ni a, Manipur club pawh hian Kerala club hi an hneh a nih chuan an champion turah a ngaih theih. 
Trau hi Churchill nen 1-1 ve ve in an inhnehtawk a, Goan club nen hnehna an chang ve ve a nih chuan goal difference en tur a ni dawn. Trau goal difference hi 11 a nih laiin Churchill erawh pali (4) chauh a ni a, Manipur club tan champion turin Gokulam hneh a tawkah a ngaih theih.
Churchill Brothers hmachhawn tur a nem ber a, palinaa awm RoundGlass Punjab nen an inkhel dawn. Red Machine tan chak ngei ngei a ṭul a, Trau le Gokulam te an inhnehtawk a ngai bawk. Phase 2 khelh ṭantirha dinhmun ṭha ber Goan club tan champion turin vanneih tel a ngai dawn.
Inkhel pahnihah draw result ve ve awm thei a ni a, hemi hi a thleng ta a nih chuan an pathum head to head en a ni dawn avangin Gokulam Kerala an champion ang.
Mizo an awm em?
Gokulam Kerala-ah hian Mizo pahnih Zodingliana Ralte leh Lalromawia te an awm. Armed Veng tlangval Adinga hian I League-ah tawnhriat ṭha tak a ni a, Shillong Lajong aṭanga inzir chhuak niin ISL club NorthEast United tan te pawh a khel tawh. 
Samlukhai tlangval Romawia erawh Mizoram Premier League chhul chhuak a tih theih a, Chanmari West aṭanga hriat hlawh ṭanin Chhinga Veng FC tan hming a chher lehzual a, Mizoram aiawh pawha feh chhuak tawh a ni.
Romawia hi Gokulam tana bul ṭan tura beisei a ni a, an khingpui Trau-ah erawh Mizo an awm lo. Gokulam-ah hian Sebastian Thangmuansang a awm a, Churachandpur tlangval hi Mizo ṭawng thiam vek niin Kerala club left back pawimawh a ni.
Churchill Brothers-in Mamit tlangval Vanlalduatsanga an kawl a, Mizo tlangval hian Goan club-ah hmun pawimawh a chang pha. Duata hi a football career ṭantirhah forward a ni a, player chak ṭha tak niin India sub junior team thlengin a khel hman. 
Aizawl FC-ah hun rei tak a awm a, Mizo club tana a hun tawp lam leh veng tana khelhnaah tlarhnung lamah hun a hmang tam chho a, Goan club-ah pawh hian defender pawimawh a ni.
Goan club-ah Lunglei rawlthar Lalengzama Vangchhia pawh a awm a, amaherawhchu AIFF Elite Academy-a inzir chhuak midfielder Zam Zama hi a khelh a rinawm loh zawk.
Top scorer inchuhna
Gokulam, Trau leh Churchill te hian champion an inchuh ringawt lo a, an player pawimawh pathumten top scorer an zawng dawn. Trau forward Bidyashagar Singh-a'n goal 11 khung tawhin top scorer a ni mek a, Manipur forward hian Mohammedan leh Real Kashmir an hneh ṭumin match zawnin hattrick a siam.
Gokulam striker Denny Antwi leh Churchill forward Luka Majcen ten goal 10 ve ve an khung a, top scorer tur a la chiang lo. I League champion tur zawnna match hnihnaah hian goal khung thei bik pathum Bidyashagar Singh, Denny Antwi leh Luka Majcen te zinga tu emaw ber hi chuan goal an khung ngei a rinawm hle.