Formula 1 kan nghak chhuak ta

Car intlansiakna sang leh ropui ber Formula 1 chu tun kar tawp aṭangin an tlan ṭan leh tawh dawn. Pathianni zan dar 8:30 hian tun season intlansiakna hmasa ber atan Bahrain Grand Prix an tlan ang.
Season thar hian thawnthu ngaihnawm tam tak a rawn herchhuahpui tura beisei a ni. Champion lai Lewis Hamilton-a'n title la hnem ber record khum theihna remchang a nei dawn. F1 legend Michael Schumacher inlan tur pawh mipui hmuh chak zingah a tel.
Lewis a fimkhur
Team tinin inbuatsaihna an nei ngawrh viau a, enchhinna an neih lai hian Mercedes chu a ṭha ber an ni bik lo. Hamilton pawhin an dinhmun hi a zep lo, nikum aiin inelna a hautak tur thu a sawi chhuak.
Hamilton chuan, "A tlan chak ber kan ni lo, a ṭha ber ni turin eng tiangin nge hma kan lak dawn tih chu thil hriat châkawm tak a ni," tiin a sawi a, a team chuan hun rei lote chhungin hmasawnna an neih ngei a beisei thu a sawi bawk a ni.
Season hmasa khan Lewis hian inelna 17 zinga 11-ah hnehna a chang thei, nomawi a chawina kawngah harsatna lian tham a tawk lo. Kuminah rinkai ni mah se chesual thei ve tho a ni a, ama sawi ang ngeiin season dang zawng aiin a harsat a rinawm.
Max beiseina
Hamilton-a'n F1 a thunun karah Max Verstappen a rawn lawr zeuh zeuh, Dutch tlangval hian nikum khan vawi hnih hnehna a chang thei. Tun hma zawng aiin tawnhriat a ngah ve tawh a, champion tura rinkai zinga mi a ni phak.
Red Bull driver chuan, "Car neih ṭhat ringawt a tawk lo, engtiangin nge i khalh chhuah tih chu a pawimawh lai a ni. Midang thusawi leh media lama inziak ten min tibuai lutuk tur a ni lo ang, kan hmabaka tih tur chauh kan ngaihtuah ang," a ti.
Max hi Sergio Perez nen an inkawp dawn a, team pumpui anga thlir chuan midang elphak tur an ni dawn. Red Bull hian an driver pahnih zingah Verstappen an duhsak zawk dawn, a chungah mawhphurhna a sang zual dawn tihna a ni.
Schumacher fapa
F1 legend Michael Schumacher chu vur tawlhna hmuna a chetsual vangin nikhaw hre loin a awm mek, a pa damloh laiin a fapa Mick Schumacher chu Formula 1 huangah a rawn zuanglut dawn - tun hma lama hming langsar 'Schumacher' tih leh F1 sawizawm a ni leh dawn ta.
Mick hian Formula 2 lamah tawnhriat a nei ṭha, a champion hial. Mahse inelna sang ber erawh a boruak a danglam daih dawn a, Haas team tana tlan tur a nih bawk avangin beisei san ngam a har. Chutih rualin a pa vangin khawvel ngaihven rawn chu a ni nghal dawn tho.
Kum 22 mi Mick Schumacher chuan, "Ka pa nen chuan khaikhin chi kan ni lo, amaherawhchu a ke hniak ka zui ve tur hi ka lawmin a phurawm ka ti takzet," tiin a sawi a, a tir aṭanga a tawp thlengin theihtawp a chhuah tur thu a sawi bawk.