Germany-in Norway hnung an zui

World Cup khel tur zawnnaah Germany-in Norway hnungzuiin inelna thlengtu Qatar-a hnathawkte an thlawp tih an pholang a, inkhelh hmain 'Human Rights' tih chu an kawr hak hmangin an tar chhuak.
Joachim Low-a hote hian MSV Arena, Duisburg-ah Iceland mikhualin Leon Goretzka (3'), Kai Havertz (7') leh Ilkay Gundogan  (56') te goal hmangin 3-0 in hnehna an chang.
Group J inkhel dangah Romania-in North Macedonia 3-2 in an hneh hram a, Armenia-in Liechtenstein 1-0 in an hneh bawk.
Mitthi an tam
FIFA World Cup thleng turin nasa takin Qatar-a inbuatsaih a, amaherawhchu stadium sa tura mi an chhawrte a enkawl danah sawisel a hlawh thung.
UK chanchinbu The Guardian-in zirchiannna a neihah Qatar-a inhlawh mi 6,500 chuang an thi tawh nia hriat a ni a, hnathawkte hi India, Pakistan, Nepal, Bangladesh leh Sri Lanka aṭanga kal khawm an ni.
Qatar hian kum 10 liam ta aṭang khan inbuatsaihna hi an kalpui tawh a, stadium thar pasarih an sak bakah airport, kawng, mipui vei vahna tur, hotel leh mikhual thlenna tur chi hrang hrang an siam.
Guardian zirchianna aṭanga a lan dan chuan December 2020 aṭang khan kar tinin hnathawk 12 zel thi anga chhut a ni.  Philippines leh Kenya te bakah ram dang aṭangin hnathawk tam tak an luta hriat a ni a, thi zingah hian heng ramte hi a lan ve loh avangin thi zat hi tun aia tam tura ngaih a ni.
Norway-in bul a ṭan
World Cup khel tur zawnna ṭan a ni a, Norway player-te chuan an kawr hmaaah 'Human rights on and off the pitch' tih chuanna kawr an ha. Football thuneitu sang ber FIFA-in thuchhuah siam zuiin Norway laka hremna an lekkawh loh tur thu an puang.
Germany-in Norway hmalakna chhunzawmin Qatar-a hnathawkte pualin hma an rawn la ve leh. Germany midfielder Leon Goretzka chuan, "World Cup a rawn thleng ṭep a, sawi zui tur a awm dawn. Thil thleng hi kan ngaihthah lo tih pholan kan duh a, kan mihringpuite tan kan pen chhuak a ni," tiin a sawi.
Human rights pawl pawhin FIFA president Gianni Infantino hnenah rang taka hma la tura ngenna an siam tawh a,  Qatar sorkar pawh insawifiahin hnathawkte himna atana hmalak an tum thu an sawi ve bawk.
Inkhel chu
Germany Joachim Low-a'n Covid-19 vangin Premier League player-te a koh loh tur thu a sawi hnuah dan an thlah dul avangin Chelsea trio Anthony Rudiger, Kai Havertz leh Timo Werner bakah Manchester City midfielder Ilkay Gundogan te a ko tel a, player pawimawh an ni.
Iceland lakah hian Bayern Munich midfielder Goretzka-a'n minute thumna lekah a khung a, Blues attacking midfielder Havertz-a'n minute sarihnaah a khung lehnghal avangin Low-a hoten chak turin harsatna an nei lo. Second half-ah Man City midfielder Gundogan-a'n minute 56-naah khung lehin Germany hi 3-0 in an chak.
Germany hian March 29, Pathianni zanah Romania an tlawh ang a, March 31 zanah North Macedonia an mikhual leh ang.