Serbia mikhual tur Portugal

Zanin dar 1:15 hian Serbia-in Red Star Stadium-ah Portugal an mikhual dawn. Ram pahnih hian World Cup 2022 khel tur zawnna match hmasa berah hnehna an chang ve ve a, zanina an inkhel tur hi  a pawimawh ang.
Portugal hian team nem Azerbaijan lakah 1-0 chauhin hnehna an chang a, goal awmchhun hi own goal a ni. Serbia pawh inchhuang thei an ni lo, Republic of Ireland lakah 3-2 in hnehna an chang.
European champion Portugal hian Azerbaijan an hmachhawn hnuah an inhliam belh lo a, Serbia nen ṭha zawkin an khel thei ang. Atletico Madrid forward Joao Felix chu match hmasa zawkah hian minute 15 chauh a khel a, amaherawhchu a khelh danah Fernando Santos a lawm avangin Andre Silva aia thlan zawk a beiseiawm.
Portugal a nih tawh chuan Cristiano Ronaldo chanchinin sawi zui a hlawh ber a, Juventus forward hian ram tana goal khung tam ber record siam tumin ṭan a la mek. Ronaldo hian Portugal tan goal 102 a khung tawh a, Iran legend Ali Daei (109) chu goal sarih chiahin a pha tawh lo.
Group khat aṭangin team khat chiah an tling nghal dawn a, Portugal tana buaina thlen theitu tur chu Serbia hi an ni. Dragan Stojkovic-a hote hian an muala an khelh dawn avangin chak beiseina an nei ang.
Serbia-in Republic of Ireland an hneh ṭumin goal thum an khung a, captain Dusan Tadic-a siamsak vek a ni. Ṭum dang ang bawkin Ajax midfielder Tadic a pawimawh dawn a, Portugal tan goal hnih khungtu Fulham striker Aleksandar Mitrovic ven uluk a ṭul bawk ang.