Mizoram wrestling champion Kolasib

Mizoram Inter District Wrestling Championship vawi lina, ni thum chhung awh, Ramhlun Sports Complex Wrestling Hall-ah nimin khan zawh fel a ni a, a pumpuiah Kolasib district chu a ti ṭha ber an ni. 
Kolasib district hian gold medal panga, silver pali leh bronze pakua an la a, pahnihna hi Serchhip district niin anni hian gold pali, silver panga leh bronze pasarih an la thung. Saitual District-in pathumna dinhmun luahin gold pali, silver pali leh bronze pakhat an la. 
Mizoram Wrestling Association buatsaih inelnaah hian mipa 77 leh hmeichhia 25, an vaiin player 102 an tel a, a kharna inkhawmah  Mizoram Legislative Assembly speaker Lalrinliana Sailo chu khuallian a ni. 
Inter District Wrestling Championship-ah hian intihsiakna chi hrang hrang, Free Style, Greco Roman Style, Women Wrestling bakah inbuan leh insuknawr hmanga inelna hi neih a ni. 
Mimal che ṭhate hnenah lawmman sem a ni bawk a, best player-ah (mipa) Kolasib tlangval Lalbiakfela a ni a, hmeichhe best player-ah Serchhip district nula Lalhunthari thlan a ni thung. 
Mipa zinga wrestler hmabak nei êng berah Aizawl district aiawha feh chhuak Lalkhawngaiha chu thlan a ni a, hmeichhe best promising wrestler-ah Saitual nula Lalhmangaihsangi thlan a ni bawk.