Romawia leh Adinga telna Gokulam an champion

I League season tawp boruak sang takah Gokulam Kerala-in anmahni ang bawka nomawi chawi thei dinhmuna ding Manipur club Trau 4-1 a lehthalin an champion. Malabarians (Gokulam sawina) hi Kerala aṭanga I League champion hmasa ber an ni a, Mizo tlangval pahnih Lalromawia leh Zodingliana Ralte te an tel a ni.
Kishore Bharati Krirangan-ah Trau tan Bidyashagar Singh-a'n goal hmahruai khung mah se Sharif Mukhammad, Emil Benny, Denny Antwi leh Muhammed Rashid te goal hmangin Gokulam-in an lehthal. Salt Lake Stadium-a inkhelah Churchill Brothers-in Luka Majcen penalty leh Clayvin Zuninga goal hnih hmangin RoundGlass Punjab 3-2 in hneh a, Gokulam nen point 29 ve ve hmu mah se Goan club-in head to head hmangin nomawi an chan. I League champion Gokulam hian season tharah AFC Cup an khel ang.
Boruak nung
I League phase 1 khelh zawhah champion turin Churchill Brothers dinhmun a ṭha a, amaherawhchu playoff-ah Goan club hian Gokulam leh Mohammedan an hneh loh bakah Trau nen an inhnehtawk avangin champion turin club dang Kerala leh Trau inkhel result-ah an innghat.
Gokulam leh Trau te hi an inhnehtawk a nih chauhin Churchill tan champion-na kawng a inhawng a, hemi a nih avang hian Kishore Bharati Krirangan-a champion ngai lo pahnih inkhel hi final-ah a ngaih theih. 
Trau tan Bidyashagar
I League nomawi inchuh boruak sang tak ngaihnawmna belhchhah turin top scorer inchuh boruak a sang tel. Trau-in goal 11 khung tawh Manipur forward Bidyashagar Singh an kawl a, Gokulam-in goal 10 khung Denny Antwi an neih bakah Churchill tan goal 10 khung tawh Luka Majcen-a'n inkhel bul a ṭan bawk.
Salt Lake Stadium-ah Churchill-in bul an ṭan ṭha a, Slovenian forward Majcen hmangin minute 8-na lekah an khung a, Goan club tan hmahruaina a nih bakah Majcen hian goal khung tam lamah Bidyashagar a nih rual bawk.
Amaherawhchu East Bengal aṭanga inzir chhuak Bidyashagar hian box pawn aṭangin mawi zetin goal mawi a khung a, Trau-in halftime-ah Gokulam lakah 1-0 in hma an hruai a, champion thei dinhmunah an ding. Inkhel dangah Churchill tan Clayvin Zuninga-a'n goal hnih a khung belh a, RoundGlass Punjab lakah 3-0 in hma an hruai ve bawk.
Goal mamawh Kerala
Gokulam Kerala tan champion turin chak ngei a ṭul a, Goan club-in Punjab club lakah goal thum ngawta hma an hruai tawh avangin draw ringawt a tawk lo tih a chiang tawh. Minute 70-naah Russian club Anzhi Makhachkala tan pawha khel tawh Sharif Mukhammad-a'n freekick aṭangin cool takin a khung. 
Kum 31 mi Mukhammad hi Afghan mi, Russia rama piang a ni a, goal mawi a khung zarah Malabarians beseina a nung. Minute 74-naah Kerala tlangval Emil Benny-a'n Trau defender ball chhuhsakin goal pawimawh a khung a, Manipur club insiamṭhat hmain minute 77-naah Ghanaian forward Denny Antwi-a'n chak nemnghehna goal-a khung.
Gokulam-in minute riat chhung lekin goal thum an khung a, injury time-ah Vincy Barretto hnawhchhuah ni mah se Muhammed Rashid-a'n khung belh lehin Kerala club 4-1 in an chak. Inkhel dangah Churchill Brothers 3-2 in an chak a, amaherawhchu Goan club hian Kerala club an hneh tawh loh avangin Gokulam Kerala-in nomawi an chawi ta zawk.

A vawi khatna a hlu
I League nomawi hrim hrim hi a hlu a, a vawi khatna a hlu zual. Aizawl FC-in 2016–17 season khan I League nomawi an chawi a, NorthEast aṭanga champion hmasa ber leh awmchhun an nih bakah India rama league sang ber a nih lai a nih avangin a hlu takzet a, club ṭha Mohun Bagan, East Bengal leh Bengaluru bakah player ṭha tel kim lai a ni.
I League nomawi hi khawpui paruk Kolkata, Goa, Bengaluru, Aizawl, Ludhiana (Punjab) leh Chennai ten an kawl tawh a, Kerala state-ah erawh chawi luh a ni lo. Tunah erawh January 2017-a din Gokulam Kerala FC hmangin Kozhikode-in I League nomawi an kawl tawh ang.
Kum li leka upa Gokulam chuan twitter-ah an fans te champion lawm lai tarlangin, "Kan ngai tawh che u, mah se nomawi nen kan rawn haw dawn e," tiin an tarlang. Club President VC Praveen chuan, " A nuamin a ropui takzet. I League kan khelh 
aṭang khan tun hun hi kan mitthla ṭhin," tiin a lawmzia a sawi.
Malabarians coach Vincenzo Annese chuan, "Ka hun tawna hlimawm ber a ni. Goal khung tam ber kan ni a, champion hi kan phuin ka hria. India rama ka season hmasa bera nomawi ka chawi nghal hi ka lawm takzet a ni," tiin Italian coach chuan a sawi.
Gokulam hian kum 2018 khan Kerala Premier League nomawi an chawi a, 2019-ah Durand Cup nomawi chawi lehin nikum khan an hmeichhe team Grace Lalrampari telna chuan Indian Women's League nomawi an chawi a, kuminah I League nomawi an chawi ta. Kum li leka upa club-in nomawi lian pali an chawi!

Pathian vang a ni e  - Adinga
Gokulam Kerala midfielder Zodingliana Ralte (Adinga) chuan an champion chu Pathian vang chauh a nih thu Vanglaini a hrilh. Adinga hi Mizoram tan age group category hrang hrang Under 14, 16 leh 19-ah te a feh chhuak tawh a, kum 2010 khan football zir turin Shillong Lajong a pan.
Kum 2010 hian Shillong Lajong hi India rama neih Manchester United Premier Cup-ah a champion pui a, India aiawhin England-ah inelna an hmachhawn a; an hmachhawn zingah khawvel club ṭha zinga tel phak Paris Saint-Germain, Newcastle United leh C.F. Pachuca (Mexico) te an tel.
Adinga chuan, "Pathian vang a ni e. Lawm dan pawh sawi thiam mai a har. Footballer nih chuan I league champion han nih chu a hlut dan a dang," tiin Vanglaini a hrilh.
Lajong-a a awm lai hian loan-in ISL club NorthEast United, Delhi Dynamos leh Pune City ah te a khel, Shillong club tana a khelh lai hian a khup (ACL) a tih nat avangin kum khat chhung inkhel thei loin a awm. Hliampui a tawrh avanginAdinga hian ngai awh turin hun a mamawh tam a, 2019–2020 season khan Neroca tan khelin tun season-ah Gokulam a zawm a, Kerala club hi I League-ah a champion pui nghal a ni.

Champion team-ah Samlukhai tlangval
I League champion Gokulam Kerala-ah Samlukhai tlangval Lalromawia tel a, Samlukhai tlangval hi Kerala club-ah player pawimawh ni phain Trau an hneh ṭumah pawh hian inkhel bul a ṭan.
Romawia hi MPL Under 17-ah Dinthar FC tan a khel tawh a, MPL club Chanmari West tana a khelh ṭhat avangin mi nawlpui hriat a hlawh ṭan. West Warriors tana a khelh ṭhat avangin kum 2018 khanMizoram aiawhin Santosh Trophy a khel a, goal li khungin Mizoram player zingah goal a khung tam ber.
Hemi ṭum hian semifinal-ah Kerala lakah an vanduai a, an hneh loh team hi an champion zui. Kerala laka a chet ṭhat avangin Gokulam Kerala hian an club-a khel turin an sawm a, amaherawhchu intuai hriam duh avangin Chhinga Veng FC a zawm a, MPL club hi I Day Football-ah a champion pui bakah Second Division I League a khelhpui bawk.
Lalromawia chuan, "Kan coach-in champion a duh a, min nawr nasat lutuk avangin first half-ah khan goal khung kan tumna lutukah kan talbuai phah. Second half-ah kan vannei a, kan champion hi kan lawm takzet. I League nomawi hi Samlukhai khaw tan ka hlan duh a, ka chhungte leh ṭhenrual ṭha min thlawp tlat ṭhintute zarah tun dinhmun hi ka thleng thei a ni," tiin Vanglaini a hrilh.