Mizoram zinkawng a tawp

India ram huap cricket inelnaah Mizoram hmeichhe team ten an thlen san ber ṭum an tawng a, tunah erawh an zinkawng a tawp ta. Women's Senior One Day Trophy khelh laiah Mizoram hi Odisha lakah wicket rukin an chak lo, pre-quarterfinal-ah an lungawi a ṭul.
Inkhel chu
Saurashtra Cricket Association Stadium, Rajkot-a inelna neihah Odisha hi ṭhum vawrah an vannei zawk a, vawm hmasak an thlang. Mizoram tan Julie Malsawmtluangi'n run 21 a vaw chhuak a, K. Lalrinawmi'n run 17 a siam bawk.
Mizoram lamin over 50 chhungin run 155 an siam a, mi pakua an thi. Target sang tak an siam thei lo; Group A aṭanga tlang Odisha lamin over 33.5 chhungin 157/4 an tlanpel a, India tana khel phak neitu team danglamna a lang.
Group match lamah Mizoram hian vawi nga hnehna an chang thei a, knockout round-ah chak lo mah se sulhnu ṭha an hnutchhiah. 
CAM a lawm
Cricket Association of Mizoram (CAM) chu Mizoram team thlen chinah a lawm. Honoray secretary Mamon Majumder chuan, "BCCI member kan nih aṭangin kum thum chauh a la ni a, kan thlen chinah hian kan lawm tawk hle.
"Pathian zarah group stage kan paltlang, state ṭhenkhat chu kum 10 hnuah pawh chak ni hmel la hmu mumal thei lo pawh an awm hial a ni. Tualchhunga kan coach ten hmeichhe team an chher dan hi lawmna tur hlir a ni," tiin Vanglaini a hrilh.
Mizoram team hian tournament khel zo mah se an chawl dawn lo. Season thar atan inbuatsaihna an nei chhunzawm dawn a, tualchhung coach kaihhruaina hnuaiah team ṭha lehzual zawk din tumin ngawrh takin training an nei leh ang.