UAE hmaah India tan fiahna hautak
Zanin dar 9:45 hian India chuan friendly match khel turin United Arab Emirates an hmachhawn dawn a, Blue Tigers-ah hian Mizo tlangval Lallianzuala Chhangte leh Lalengmawia (Apuia) te an awm.
India hian international friendly match hnih khel turin UAE hi an pan a, kar hmasa Ningani zan khan team ṭha Oman nen 1-1 in an inhnehtawk - India tan result ṭha a ni.
Zaninah pawh India-in beiseina sang tak nen UAE an hmachhawn ang tih a chiang a, chutihrual chuan he team hi Asian team ṭha sawi a nih apianga lam hmaih an nih ngai loh avangin Oman hmachhawn aiin a harsa zawk dawn.
India bihchianna
Oman lakah Igor Stimac-a'n 4-3-3 formation hmangin player enchhin a thlang a, second half-a Lalengmawia luh hnuin an game-a danglam sawt a, an him hram.
Stimac-a'n zaninah Oman laka inlan lo player aṭangin first XI a thlang tura ngaih a ni a, Croatian coach hian hetianga thutlukna a siam a nih chuan Lianzuala leh Apuia tan bul ṭanna chance a awm ang.
Chennaiyin forward Lianzuala chuan, "Bul ṭan tur hi hriat hleih theih a ni lo a, Coach hian player enchhin vek a duh avangin a lut tur ber sawi thiam a harsa. Inrin reng a ngai a ni tawp mai," tiin Vanglaini a hrilh.
Duhthlanna
Stimac-a'n Oman laka inkhel aṭangin player siksawi dawn viau pawh ni se duhthlan tur a nei ṭha a, a bik takin midfield-a Jeakson Singh leh Suresh Singh-ten bul an ṭan nawn a rinawm chiah lo.
Chutiang a nih chuan midfield-ah Apuia leh Raynier Fernandes tan hmun a awm dawn tihna a ni a, Oman laka a khelh dan en chuan Rowllin Borges pawh hian hmun chan nawn a phu lo - Anirudh Thapa-te pawh an la awm.
Ashique Kuruniyan-a'n hmun chan nawn a phu lo a, Bengaluru forward lakah Stimac-a'n duhsakna a lantir zui a nih loh chuan Lianzuala tan hmun a awm thei ang.
UAE an ṭha
India leh UAE hi vawi 14 an intawng tawh a, India-in vawi hnih chiah hnehna an la chang ve - vawi thum draw result an nei a, vawi kua UAE lam an chak. Match 14-ah hian India-in goal 26 an chhuah a, goal sarih an khung ve thung.
Blue Tigers tana lawmna turin midfielder ṭha Abdullah Al-Naqbi leh Caio Canedo chu hliam vangin an inlan thei dawn lo a, Canedo hi Brazilian ni mah se UAE khua leh tui nihna nei a ni a, Botafogo leh Internacional tana inlan thei khawpa player thiam a nih avangin a inlan thei lo tur hi UAE tan chuan channa a ni.
UAE coach Bert van Marwijk hi Feyenoord, Borussia Dortmund, Netherlands, Hamburger SV, Saudi Arabia leh Australia pawh lo enkawl tawh a nih avangin tawnhriat a nei ṭha a, World Cup 2010-ah khan Netherlands chu final a hruai thleng hial.
En bik tur
UAE legend Ali Mabkhout hian ram tan match 86-a khelhah goal 65-a khung tawh avangin dah hniam theih a ni lo a, UAE club ṭha Al Jazira tana khel striker hi India tlarhnung tan ven bik a sual lo ang.
Argentine mi, UAE khua leh tui nihna nei Sebastian Tagliabue hi kum 36 ni tawh mah se goal khung a la uar reng avangin middle-east lamah chuan footballer ngaihsan rawn a ni a, ngaihthah a thiang lo.
Brazil Serie A club Atletico Clube Goianiense aṭanga bul ṭantu Fabio Virginio pawh hi thisenah chuan Brazilian ni mah se UAE khua leh tui nihna nei a ni a, tlarhma khawiah pawh chhawr theih a nih avangin a ṭangkai lehzual.
Khawiah nge en tur?
Inkhel hi Eurosport chuan live-in an pe chhuak dawn a, app lama en duh tan JioTV leh Abu Dhabi Sports 1 website/app-ah te a en theih ang.
Eurosport hi India leh Oman inkhel pawh live-a pe chhuak tura tih an ni a, mahse, technical lamah harsatna an tawh avangin India inkhel hi an pe chhuak thei lo.
Zaninah erawh Eurosport lam hian live-a inkhel pekchhuah ngei an tum thu an sawi tawh a, Oman leh India inkhelh zan ang kha chuan harsatna awm tawh lo tura ngaih a ni.
Kan inbuatsaihna a ṭha a, team boruak pawh a ṭha e. Team anga kan khelh phawt chuan kan hneh theih lohna chhan tur ka hre lo a, a phurawm ka ti.
Team ṭha hmachhawn hnem hi inzir nan a ṭha a, anni ang team kan tum hian hmasawn kan mamawhna laite a hriat a, inzir belh kan mamawhnate pawh hriat a awl em em. He game aṭang hian zir tur tam tak kan zir belh ka beisei.
- Lallianzuala Chhangte
Theihtawp chhuahin practice kan nei reng a, kan hmachhawn tur team-te hneh theih dan tur duangin kan thawkrim hle. Bul ṭan tur hi hriatthiam a la harsa deuh a, bul ṭan ve theih erawh ka inbeisei.
Ranking aṭanga thlir ringawt pawhin UAE (FIFA ranking 74) hi team ṭha an ni, tih hai rual a ni lo a, player-te pawh tawnhriat nei ṭha leh chak zawk an nih dawn avangin Oman ai khan harsa zawk turah ka ngai. Keini lam chuan theihtawp kan chhuah phawt ang a, result erawh Pathian kut a ni.
- Lalengmawia (Apuia)