Kvitova lakah Konta a tlawm

Miami Open khelh laiah seeded pakuana Petra Kvitova chuan Johanna Konta hnehin last 16 a lut a, quarterfinal lut tur chuan seeded pangana Elina Svitolina a hneh leh a ngai ang.
Wimbledon vawi hnih champion tawh Kvitova tan chak turin harsatna a awm lo, minute 58 chhung lekin 6-1, 6-2 in hnehna a chang. 2017 Miami Open champion Konta-i'n beisei a phak lo, a khingpui service a chhuhsak miah lo, break point pawh a hmu lo.
Inkhel dangah Svitolina chuan Ekaterina Alexandrova lakah 7-6 (7-1), 6-4 in hnehna a chang a, tournament kal laiah Svitolina leh Kvitova an kaltluan avangin last 16-a an inhmachhawn tur hi a hmuhnawm ang.
Victoria Azarenka pawhin Angelique Kerber 7-5, 6-2 a hnehin a thiam zual 16 zingah a inhlangkai ve bawk, a hmabak chu Ashleigh Barty a ni dawn. Champion lai Barty hian French Open champion hlui Jelena Ostapenko 6-3, 6-2 in a hneh.
Seeded pathumna Simona Halep erawh a inhnukdawk, Romanian nula hi Anastasija Sevastova nen inkhel tur ni mah se a dar (shoulder) hliam vangin a inlan thei ta lo a ni.