Ronaldo goal khung an pawm lo

Hun tawp dawnah Cristiano Ronaldo-a'n Portugal tan chakna goal a khungah a inngai a, mahse pawm a ni lo! Inkhelh banah Ronaldo a lungawi lo a, captain aramband a hren lai chu paih thlain thinrim takin khelmual a chhuahsan.
Inrinni zan World Cup qualifier Group A inkhelah Portugal hi Serbia mualah mualneitu nen 2-2 in an inhnehtawk. Muikhual Portugal tan Diogo Jota-a'n chawlhlawk hmain goal hnih a khung a, mualneitu lamin inkhel chawhnu lamah Aleksandar Mitrovic leh Filip Kostic hmangin an sut.
Rajko Mitic Stadium, Belgrade-a inkhelah hian Ronaldo-a'n ball kang lai chu goal lamah pet nghalin goalline pawh a pel ngei, mahse an inkhelhna hmunah hian goalline technology a awm lo a, referee thutlukna an pawm tlang mai a ngai.
Ram tana goal 102 khung tawhtu Ronaldo chuan, "A chang chuan thutlukna pai dam harsa tak kan tawn chang a awm ve ṭhin. A bik takin ram pumin kan tawrh theih a nih avangin a pawi lehzual.
"Inkhelh banah referee khan an tihsual avangin ngaihdam min dil hial, tunah chuan hmalam thlirin kawng dik kan zawh chhunzawm leh tawh ang," tiin a sawi a, khelmual a chhuahsan lai hmutu tan chuan Ronaldo hi a lungawi lo hle tih a lang chiang.
Serbia pawh an lawm a kim bik lo, hun tawp hma deuhin an defender Nikola Milenkovic chu Danilo Pereira laka a chet dan mawi lo avangin hnawhchhuah a ni a, a tir aṭanga a tawp thlengin ram pahnih inkhel boruak a nung hle.
Group A-ah Portugal leh Serbia hian match hnih khelh aṭangin point li ve ve an nei. Group match inkhel dangah Luxembourg chuan an mikhualna ramah Republic of Ireland chu 1-0 in an luhchhuah ve thung a ni.