ISL final khel tur a chiang dawn ta

India rama football league sang ber Indian Super League semifinal second leg chu zanin hian khelh a ni dawn a, FC Goa chuan Mizo tamna Chennaiyin FC chu zanin dar 7:30 hian an mikhual dawn. 

Semifinal first leg-ah khan Chennai club hian 4-1 in hnehna an chang tawh a, inrintawkna nasa tak nen FC Goa khelmual an lenglut ang tih a chiang.  

Hriat tel atana ṭha erawh football-ah chiang sa a awm thei lo a, Chennaiyin hi chak chiang sa kala an kal chuan chesual thei an ni. Pathianni zan dar 7:30-ah Bengaluru FC chuan ATK an lenchilh ve dawn bawk a, inkhel hmuhnawm beisei a sual lo ang. Club pahnih intawn hmasakah Blues-in 1-0 in hnehna an chang a, ATK-in thlak danglam an tum dawn. 

Chennaiyin khelmualah dawl zawrin FC Goa an zawr a, goal li ngawt an chhuah. Hriat telsak tur erawh player pawimawh Brandon Fernandes leh Hugo Boumous chu dam lohna leh hliam vangin Chennai-ah an inkhel thei lo. 

Player pahnih hian tunah erawh club training an zawm leh tawh a, zaninah Chennai club an hmachhawn thei dawn. Danglamna thlen tur khawpin an ṭha tawk a, Goan club-in comeback ropui thlentir theih an inbeisei ang. 

Brandon hi match 16-a assist vawi ruk leh goal hnih nei thei a ni a, Boumous hian match 14-ah goal 11 khungin assist vawi 10 a nei thung - an ṭha tawk. Player pahnih telin Goa hian an duh ang takin 4-2-3-1 an hmang thei dawn tihna a ni a, tun season-a goal 16 khung tawh Ferran Corominas chu tlarhmaah a mal tlat leh ang a, a hnungah Boumous hian a thlawp ang. 

Chennaiyin-ah Mizo pathum Lallianzuala Chhangte, Jerry Lalrinzuala leh Laldinliana Renthlei ten inkhel bul an ṭan leh ngei a rinawm a, player pawimawh ni phak ṭhiau an ni. 

Semifinal hmasa zawkah Lianzuala hian goal a khung a, Jerry hian assist neiin Emerging Player of the Match-ah thlan a ni a, Dinliana chu tlarhnungah player pawimawh a ni bawk. Jeje Lalpekhlua leh Zotea Ralte chu hliam vanga inlan lo tur chiangsa an ni a, Chennaiyin hian tun season-a an chhawr tawh player pawimawh zingah hliam kawl an nei lo. 

Chennai club tan tlarhmaah goal khung khawl Nerijus Valskis bawk innghahna a ni leh ang a, midfield-a Anirudh Thapa khelh danin Chennaiyin dinhmun tur a hril thui viau bawk ang. 

Semifinal match hmasa zawkah ATK-in 1-0 in Bengaluru an ngam lo a, khualmualah goal khat pawh khung loin an haw - away goal rule hman a nih avangin an tuar mai thei. 

Bengaluru hian Kolkata khawpuiah tlarhnung lam ngaih pawimawh an pawi ti lo ang tih a chiang a, ATK tan season hmasa A League-a striker inkawp fuh ber pawl Roy Krishna leh David Williams chet ṭhat a ṭul ang. 

Roy Krishna hian tun season-ah goal 14 a khung tawh a, David Williams hian goal nga a nei thung - A League-a an 'magic' ang kha an lantir leh thei a nih chuan Bangalore club tan a harsa dawn. ATK goal nawr na dang turin Bengaluru tan defensive midfielder Erik Paartalu a pawimawh leh dawn a, tlarhmaah Sunil Chhetri bawk chu innghahna a ni ang.