Curry kir niah Warriors chak lo

Golden State Warriors tan Stephen Curry a inkhel thei leh ta a, star player rawn let tawh mah se Warriors an chak chuang lo. Nimin zing inkhelah Toronto Raptors lakah 121-113 in an tlawm.

American guard hi nikum October thla khan a inhliam a, a ban ruh tliak vangin a inkhel lo rei hle. A rawn kir lehna hmasa berah hian minute 27 chhung khelin point 23 a neih bakah rebound vawi sarih a la.

Season hmasa NBA Finals-a inhmachhawn te an inkhel tawk a, Raptors tan Normal Powell-a'n point 37 neiin a team a chak pui a, a club hi NBA playoff a hruai thleng nghal bawk.

Kum 31 mi Curry chuan, "Ka dam ṭha viau, harsatna nei loin ka khel thei. Hun rei tak match pangngai khelh loh hnua inkhelh leh thut chu a awsam lo deuh a ni, hun rei lote chhungin ka insiamrem leh theih ka beisei," tiin a sawi.