Chawnpui ngam loh Raymond Miller
Mizoram Super League khelh laiah Chanmari Vikings thiampuipa Raymond Miller chuan Chawnpui Basketball Club lakah point 53 teh meuh neiin a team hi 110-84 in hnehna a chanpui - tualchhung basketball inelna sanga match khata point nei hnem ber record a siam.
Ningani zan Hawla Indoor Stadium, Republic Vengthlanga inkhelah Vikings an chungnung a, season kal laiah match khata point 100 nei tling thei hmasa ber an ni bawk; match thum an khelh tawhah vawi hnih chakin pahnihna dinhmun an luah.
Point 53 chu!
MSL-ah player ṭha hrang hrang kan hmu nual tawh - Ronald March-a'n Mission Veng Vikings a champion pui tawh a, season hmasa khan Veron Young chuan Zarkawt BCA tan match khata point 48 ngawt neiin record a lo siam tawh - an champion zui.
Season 6 kan thleng a, American forward Raymond Miller-a'n Chawnpui hmaah zahngaihna lantir loin point 53 leh rebound vawi 30 teh meuh a nei, a pahnih hian record thar a ni nghal. Vikings hi semifinal chu a thlen pui chiangah a ngaih theih a, engtiang chena thui nge an thlen dawn hriat a chakawm.
Chanmari Vikings coach H. Lalhruaitluanga chuan, "A theihna tak tak kan la hmu lo deuhin ka hria, team khauh zawk lakah fiahna a la hmachhawn dawn," tiin a ṭawng fimkhur hle. Raymond hian (28pts vs TBL, 33pts vs RSC, 53pts vs Chawnpui) match thum a khelh tawh chinah chuan fans beiseina a la ti hlawhtling vek.
Hmabak
Season ṭan hma khan Chanmari Vikings hi champion tura rinkai an ni lo, mahse tunah erawh champion lai Zarkawt BCA leh Khatla TBL tana mut ti tui lo khawpin an khel chhuak mek. March 13, Zirtawpni zanah BCA nen hian an inkhel dawn, a pawimawh khawp ang.
Chak lo Chawnpui tan erawh a sang pali zinga tel phak beiseina a tlem tawh, match thum an khelh tawha la tlawm vek team hian zaninah Zarkawt BCA an hmachhawn zui leh nghal dawn, an chak lo a nih chuan semifinal beiseina a tawp ang.
Zarkawt BCA coach Lalruatfela'n league round-ah a sang ber nih a pawimawh thu a sawi tawh. Afela chuan, "A sang ber nih chu duhthusam a ni a, semifinal fixture pawh a awlsam phah thei," tiin Vanglaini
a hrilh tawh - zaninah Chawnpui hlah thlem an tum lo tawp ang tih a hriat theih.
Thlirna Tawi
Chanmari Vikings 110 - 84 Chawnpui BC
QTR 1 2 3 4 Tot
VKS 24 28 28 30 110
CBC 25 19 20 20 84
VKS
# Player Point Rebound Block Assist
1 Raymond Miller 53 30 2 2
2 Michael F 19 3 0 2
3 Lalhlunmawia 13 7 0 3
CBC
# Player Point Rebound Block Assist
1 Harry Roop Singh 29 5 1 6
2 K. Lalremsanga 17 2 0 1
3 Laltlanhlua 7 1 0 0
Team Dinhmun
# Team Pld W D L PD Pts
1 Zarkawt BCA 3 3 0 0 40 6
2 Chanmari Vikings 3 2 0 1 31 5
3 Khatla TBL 3 2 0 1 14 5
4 Tuikual South 2 1 0 1 -1 3
5 Chawnpui SC 3 0 0 3 -33 3
6 Ramhlun SC 2 0 0 2 -51 2