Arteta-a'n pangana chin a beisei

Arsenal manager Mikel Arteta chuan zanin dar 8:30-a West Ham nen London derby an khelh tur a thlirlawk a, hnehna an chang a nih chuan a sang zual panga china tel beiseina a san thu a sawi.

Arteta chuan, "West Ham nena kan inkhel tur hian ka rilru a luahna a rei tawh, hnehna kan chang a nih chuan pangana dinhmun kan hnaih sawt dawn. Match tin a pawimawh vek a, point thum kan hmu zel a nih chuan match tawp lamah chuan palina emaw pathumna emaw thlengin kawng a la in hawng," a ti.

Gunners hian Premier League match 27 an khelh tawhah point 37 hmuin 10-na an ni mek, pangana Manchester United an phak lohna chu point nga a ni; Arteta naute hian match khatin an khel tlem zawk, an inkar a zau lo hle.

Europa League-a an tlak hnuah FA Cup lamah hnehna an chang leh tawh a, striker Pierre-Emerick Aubameyang chu FA Cup-ah chawlhtir a ni a, zanina Hammres an hmachhawn hunah erawh a inlan ang.

Auba chungchang sawiin Arteta chuan, "Olympiakos ken hneh loh ṭum khan goal khung theihna hun ṭha ber a neih chu a hlah, goal a khung loh avang khan a nguiin hrehawm a ti hle. Mahse, ani hian hun tam tak dinhmun ṭha takah min hruai tawh. "Kan chak loh vang khan a lungngai a, hrehawm pawh a ti hle. Amaherawhchu kei leh player dang ten a hrehawm tihna kan hriatthiampui, tunah chuan nuamti takin training a nei leh tawh," tiin EPL top scorer ni lai chu inkhel tura a inpeih thu a sawi.