Argentina-ah Marquez a chak ber

MotoGP world champion lai Marc Marquez chuan Argentine MotoGP-ah chiang takin hnehna a chang a, tun season intlansiak vawi hnih an hmachhawn tawhah point 45 hmuin hmahruaitu a ni.

Pathianni zana inelna neihah Honda rider Marquez hian pole position aṭanga bul ṭanin amah hnaih bertu Valentino Rossi aiin second 10-in a thleng hmasa zawk. Qatar GP-a pakhatna Andrea Dovizioso chu pathumnaah a thleng thung.

Tun hnai season ruk chhunga world champion vawi nga ni thei Spanish tlangval hian season bul ṭannaah Andrea Dovizioso a umphak lo a, pahnihnaah a thleng. Termas track-ah erawh lap 25 an tlan chhungin rider dangte el phak rual lohin a chungnung.

Kum 26 mi Marquez chuan, "Pole chan hi thil awlsam a ni lo a, khaw awmdan a zirin intlansiak chanchin hi a danglam daih thei," tiin intlansiak hmain a sawi a, hnehna a chan hnuah boruak nuam tak hnuaia intlansiak chu a hlimawm thu a sawi zui leh bawk.

Marquez hnungah hian Rossi leh Dovizioso te an inum tawk hle a, vawi 12 ngawt an dinhmun an inthlakthleng. Na taka an innawr hnuah erawh world champion a nih hmasak ber aṭanga season 23-na hmang mektu Rossi-a'n a tawnhriat ngah chhawr ṭangkaiin a chungnung.

Tun season chhungin bike intlansiakna sang ber hi vawi 19 an tlan dawn a, round thumna atan April 14 hian Grand Prix of The Americas chu Austin, Texas-ah an tlan leh dawn a ni.