Ibra leh Rooney ten goal an khung

Major League Soccer-ah Los Angeles Galaxy chuan nimin khan Portland Timbers 2-1in an hneh a, Zlatan Ibrahimovic chuan penalty aṭangin goal hnih a khung. Inkhel dangah DC United-in Orlando City 2-1 thoin an hneh a, Wayne Rooney-a'n goal pawimawh a khung ve bawk.

Stubhub Center-ah kum 37 mi Ibrahimovic chu inhliam vanga match hnih a awl hnuin a rawn kir a, minute 33-naah Swede striker hian penalty aṭangin hmahruaina goal a khung. Portland-in Jeremy Ebobisse hmangin first half tawp hma hretin an sut. Second half-ah Ibrahimovic chu team chhandamtu a ni a, keeper Jeff Attinella lakah penalty a hlawh chhuak. Manchester United striker hlui hian minute 65-naah penalty hi a laiah (panenka) pet keuhin chakna goal a ni zui bawk.

DC United-in Orlando City Stadium-ah Steve Birnbaum hmangin minute rukna lekah hma an hruai a, Rooney-a'n minute 30-naah goal hnihna a khung. Orlando-ah hian Manchester United-a Rooney khelhpui ṭhin Nani pawh a khel a, team ṭha lo zawk nichungin an bei let a, Dom Dwyer hmangin minute 63-naah siphurh sut ṭhen mah se goal dang a luh belh tawh lo.