India Open champion Viktor Axelsen

Viktor Axelsen chuan tualchhung tlangval Kidambi Srikanth chu 21-7, 22-20 a hnehin Yonex-Sunrise India Open 2019 champion a ni a, hmeichhe lamah Ratchanok Intanon chu pakhatna a ni bawk.

Pathianni zan Delhi-a mipa singles final hi 2015 final rematch a ni a, Denmark tlangval hian game hmasa zawk awlsam taka a lak hnuah game hnuhnung zawk erawh harsa takin a la. 2017 champion hian match point a hmuh hmasak ho chhawr ṭangkai thei lo mah se BWF World Tour Super 500 tournament title a lakna tur hi Srikanth-a'n a dang zo lo.

World number 4 Viktor Axelsen hian game hmasa hi 21-7 ngawtin a la a, All England Open final khel zo hlim a ni bawka inrintawkna pawh a nei sang. Game hnuhnungah hian 12-12 te in inhnehtawk chho. India tlangval hian 20-18 a hmahruaina game point nei mah se a hlawhtling thei lo a ni.

Hmeichhe inelna lamah Intanon hian He Bingjiao 21-15, 21-14 in a hneh a, Thailand nula Intanon hi Indian Open-a hmeichhe singles player vawi thum champion thei hmasa ber a ni - 2013 leh 2016 khan he hmunah hian hlawhtlinna a lo chang tawh bawk a ni.
Ratchanok hian bul a ṭan fuh lo zawk a, an intawn hnuhnung vawi lia a ngam loh lakah hian 9-6 in a hnufual hmasa. Mahse, a chet ranna hmangin na takin a khingpui hi a nawr a, semifinal-a PV Sindhu hnehtu Bingjiao hi huaisen takin a pawhthla thei. 

World number 1 hlui Ratchanok chuan, "Kan intawn tawhna bakah Sindhu nen kan inkhelh aṭang khan thil ka zir chhuak thar a, final kan khelh hma hian vawi li ka ngam lo zawn tawh tih hre mah ila Indian Open hi ka khelh ṭhat ṭhinna hmun a nih avangin ka chak theih kha ka beisei a ni," tiin a sawi.