Atletico inkhel boruak a 'hot' dawn

Spanish La Liga kartawp inkhelah Atletico Madrid, Barcelona leh Real Madrid an inlan vek dawn a, Spanish football ngainatute tan mit a tlai dawn. 

Club lian zingah Atletico inkhel turin ngaihven a hlawh a, hei hi Champions League khel tura an elpui Sevilla an hmachhawn dawn vang a ni - zanin dar 8:30-ah an inlan ang. El Clasico-a chak lo hlim Barcelona chuan zanin dar 11:00-ah Real Sociedad an mikhual dawn a, league nomawi humhim an duh chuan tawlh thluk a thiang tawh lo. 

Barcelona an hneh avangin Real Madrid 'puja' a fuh leh ṭan tawh a, Pathianni zan dar 1:30-ah Madrid khaw club hian Real Betis chu an lenchilh dawn a ni. 

La Liga-ah Atletico hi pangana an ni mek a, pathumnaa awm mek Sevilla nen an inthlauhna chu point hnih chauh a ni - Madrid khaw club hian season tharah Champions League khelh an duh chuan Sevilla an hneh a ṭul ang. 

Atletico hian tun hnaiah an beisei ang result an nei hleithei lo. Inelna hrang hranga an match hnuhnung pasarihah vawi khat chauh chak chungin Liverpool chu Champions League last 16-ah an hneh mial a, Villarreal an ngam zui. 

Mahse, Atletico fan-te an phur dawn chauh a, Espanyol an inhnehtawkpui zui - an tho hlei thei lo. Zanina an mikhual tur pawh tun hnaia che ṭha tak Sevilla an ni a, fans an hlauthawng a nih pawhin dem theih an ni lo. 

Diego Simeone-a'n a hman thiam sa 4-4-2 a rawn hman leh ngei a rinawm a, tlarhmaah Joao Felix leh Alvaro Morata inkawpin midfield aṭangin Angel Correa, Marcos Llorente, Saul Niguez leh Koke ten an thlawp ang. 

Barcelona-in beiseina sang tak nen Ernesto Valverde an ban hnuah Quique Setien an lalut a, mahse Johan Cruyff-a system kalpuitu coach ruahmanna hnuaiah Barca player-te an la bel tawk lo a, an talbuai rih hle. 

Setien ngei pawh hian a player-te a la hrechiang tawk lo niin a lang - kum 20 mi midfielder Riqui Puig hi Setien-a system hnuaia ṭha tura beisei ni mah se hmun a chang phak lo a, Ansu Fati hian Setien-a match hmasa parukah bul ṭan mah se a match hnuhnung pathumah minute 12 chauh a khel thung!

Mahse, Setien chuan a thutlukna hi sawifiahin, "Match hnih tlawm pawha talbuai lo tur ni ila, academy player ka khelhtir em em ang," a ti a, risk la thei dinhmunah a la din rih loh thu a sawi. 

Kum 61 mi coach hian Barca hi match 11-ah a kaihruai tawh a, vawi sarih chakin vawi khat an khingpui an inhnehtawkpui a, vawi thum an tlawm - khawvel player ṭha rual kawltu manager tan uanpui chi a ni lo. 

Real Madrid forward Eden Hazard chu a ke hliam vangin Dallas, USA-ah zai a ni a, Chelsea forward hlui hi hlawhtling taka zai a nih thu Madrid khaw club chuan an puang. 

Spanish club chuan thuchhuah siamin, "Hazard zaina chu hlawhtling taka kalpui a ni a, Real medical team-in an ṭawiawm bawk. Clinic lamin an chhuah hma chu enkawlna hnuaiah Hazard hi a awm dawn a ni," an ti. 

Belgian forward hi thla hnih emaw thla thum tal a chawlh a rinawm a, a season a tawp ang pawhin a sawi theih - beiseina sang tak nena Real pantu forward hian match 15 chiah la khelin goal khat a khung!

Pathianni zanah pawh Hazard tel loin Real an khel dawn tihna a ni a, Barcelona aia point khata an sanna chhawm nung zel turin tlawm a thiang lo.