Napoli beiseina a la thi lo
Serie A nomawi chawi turin Juventus dinhmun a ṭha tawh hle a, anmahni elphak ber Napoli chuan Pathianni zan khan AS Roma chu 4-1 ngawta luhchhuahin title an beiseina chu an la chhi nung ve zel.
Mikhual team tan hian Arkadiusz Milik, Dries Mertens, Simone Verdi leh Amin Younes ten goal khat ṭheuh an khung a, Claudio Ranieri enkawl Roma goal neih chhun hi chawlhlawk hma chiaha Diego Perotti-a'n penalty aṭanga a khung a ni.
Napoli hian an chunga awm Juventus hi point 15 in an phak lo mek, chak lo Roma erawh pasarihnaah awmin Champions League khel phak china awm AC Milan an phak lohna chu point li a ni mek thung.
Roma hian season an hmangṭha lo a, an manager hmasa Eusebio di Francesco chu March 7 khan banin beiseina sang tak nen Ranieri an lalut. Mahse, Italian manager kaihhruaina hnuaiah hian a zawnin match hnih an tlawm ta.
Roma chairman James Pallotta chuan, "SPAL kan hneh loh ṭumin kan khel ṭha lo a, tuna Napoli nen kan inkhelh hian kan khel chhe zual. Kan hun harsa tawh mek hi a liam thuai theih nan boruak thar kan tem vat a ngai a ni," tiin hmasawn an duh thu a sawi.
Pathianni zan inkhel dangah Inter Milan chu an mikhual Lazio lakah 1-0 in an tlawm, goal awmchhun hi minute 12-na leka Sergej Milinkovic-Savic-a'n hnai tak aṭanga a tauh luh a ni.
Inter Milan hian captain nihna an hlih sak Mauro Icardi chu an la chhawr lo chhunzawm zel, Argentine striker awm loh lai hian Ivan Perisic chuan hun ṭha vawi hnih nei mah se Lazio keeper Thomas Strakosha a paltlang zo lo.