RCB an tlawm leh tawh

Indian Premier League khelh mekah Royal Challengers Bangalore an tlawm leh ta a, Pathianni zan khan Sunrisers Hyderabad lakah run 118 ngawtin an tlawm - an match hmasa pathumah an tlawm vek tihna a ni!

Hyderabad khawpuia inkhelah SRH an bat hmasa zawk a, opener pahnih David Warner (114 runs) leh Jonny Bairstow (100, not out) ten century an vuakchhuah ve ve avangin an chance a ṭha nghal hle. 

Mualneitu team hian over 20-ah run 231 an siam a, wicket hnih chiah an hloh - beisei phak lo RCB tan chak tur chuan hmabak a ko takzet. 

RCB hian over 19.5-ah run 113 chiah tlinin an out vek a, an chhuanvawr Virat Kohli (3) leh AB de Villiers (1)-te an chet chhiat bawk avangin an mualpho chiang hle - over lia wicket li latu Mohammad Nabi an ngam lo. 

Match thum a zawna RCB an tlawm laiin Chennai Super Kings erawh a zawna a vawi thum nan hnehna an chang a, run riatin Rajasthan Royals an hneh. 

CSK tan hian run 75 siama a tawp thleng dam MS Dhoni chu an innghahna a ni a, India captain hlui zarah run 175 tlinin wicket nga an hloh - run 36 siamtu Suresh Raina a che pangngai viau bawk.

Rajasthan tan opener leh captain Ajinkya Ra­hane chu run pawh siam loin a out nghal a, run 46 siam­tu Ben Stokes leh Rahul Tripathi (39) tih loh run 30 vaw kai thei an awm lo a, uiawm takin an chak zo ta lo - over 20-ah run 167 siamin wicket riat an hloh.