Spurs ngamtu Liverpool tan nomawi a hnai zel
Liverpool-in season chawhnu lama an nomawi kawl tur tibuai thei tur club pakhat chu an hnawt kiang leh ta phawt. Pathianni zan khan Tottenham Hotspur chu 2-1 in an hneh.
Merseyside club-in hnehna an chan leh tak avangin Premier League table chung berah point hnihin an sang fal leh ta a, hriat tur atana ṭha erawh an hnuai chiaha awm Manchester City aiin match khatin an khel tam.
Liverpool tan hian Roberto Firmino chuan goal hmahruai a khung a, Lucas Moura chuan si phurh hi sut mah se Hugo Lloris chetsual zarah Toby Alderweireld chuan an lamah a ti lut a, hun a tawp zui avangin 2-1 in Reds an chak.
Reds-in match ruk chauh khelh tur an nei tawh a, club lian zingah Chelsea an la tum dawn. City-in match sarih an la hmabakah Spurs leh Manchester United an la tum dawn a, club pahnih inum boruak a sang tawlh tawlh.
Beiseina
Anfield-a inkhelah team pahnih an inhlau lo tawn a, innawr tawn a, goal khung chu an tum a ni - minute 16-naah Liverpool zawkin an duh goal an zawng hmu a, Roberto Firmino chuan Anfield-a a league match hnuhnung paruka a goal sarihna a tauh lut.
Team pahnih inngam ngaihtuahin goal erawh kan hmu lawk lo a, he inkhela goal hnihna hmu turin minute 70 kan nghah thlen a ngai - second half-a team ṭha zawk Spurs tan Lucas Moura chuan an si phurh a rawn sut.
Mahse, Anfield-in a ze ngai a chhuah a, goal an chhuah avangin fan-te an ngawi mai lo - an team tan theihtawpin an aw rawl an chhuah a, khelmualah player-ten fans chhanlet nan beidawng duh loin a tawp thleng an bei.
Minute 90-naah Reds hian an beidawn duh loh rah an seng ta nge nge. Mohamed Salah ball tauh satliah nia lang chu Lloris chuan man nghet zo loin Alderweireld ke a nam per a, an lamah a lut - 2-1 in Liverpool an chak.
Vanneihna
Minute 90 chhunga team pahnih inkhel en chuan Liverpool-in chak an phu a tih ngam a, chutihrual chuan tun season-a match ṭhenkhata an goal khung hun leh Spurs laka an goal khung hun ngaihtuah kha chuan vanneihnain a zui tel tih loh rual a ni.
October-a Anfield-a City nen an intawn ṭum khan Riyad Mahrez chuan penalty a pet goal lo a, goal khung loin an inhnehtawk phah.
Everton goalkeeper Jordan Pickford chetsual vanga minute 96-naa Divock Origi-a'n Merseyside derby-a Reds a chakpui pawh kha kan la theihnghilhin a rinawm loh.
January-a 4-3 a Crystal Palace an hneh ṭum khan veteran keeper Julian Speroni chetsual zar an zo tih loh rual a ni lo - tunah chuan heng ho zingah hian Lloris hming a dah tel ve theih ta.
Mahse
Liverpool-in vanneihna an ken tel thu kan sawi ruala hriat tel atana ṭha chu chak zo dawn lo emaw tih hnua hnehna chan leh ṭhin hi 'champion zia' tia kan sawi ṭhin kha a ni.
He vanneihna tia sawi hlawh chhuak tur hian thawhrim tel a ngai bawk. Spurs-in minute 70-naa an si phurh an rawn sut khan team tam tak tan chuan beidawnna tur a ni tawh.
Mahse, Liverpool player-te erawhin champion tur chuan a tawp thlenga theihtawp chhuah a ngai tih an hria a, a tawpa an goal khung pawh hi an beih hram hram rah, tia sawi theih a ni.
Liverpool boss Jurgen Klopp chuan, "Goal khung hun hi a pawimawh ber a ni lo a, a pawimawh ber chu inkhelh zawha scoresheet-a lang zat hi a ni," tiin a sawi.
Klopp thukhawchang
Liverpool-in first half an thunun a, Firmino-a'n goal a khung bakah Sadio Mane chuan chance duhawm vawi hnih a nei bawk - mahse Senegalese forward hi ṭum dang angin a ke a hmui tlat lo.
Liverpool boss Jurgen Klopp chuan, "First half-ah chance duhawm tak tak kan nei a, goal ṭha tak kan khung bawk. Mahse, second half-ah kha chuan kan talbuai a, goal an khung chiah khan kan harh leh zawk a ni," a ti.
German coach chuan Premier League nomawi inum chungchang sawi nghalin, "Khawvela team ṭha ber Manchester City nena inum kan ni a, zaninah khawvela team ṭha pawl Spurs kan tum bawk a, a harsa a ni.
"Beidawng loa theihtawp kan chhuah zel a ṭul a, zaninah pawh khan fan-ten a tawp thlenga min auh phur avangin kan chak a ni," tiin theihtawp chhuah a ṭul thu a sawi.
Spurs dinhmun
February thla tira champion thei dinhmuna ding hman Spurs an tlawm leh tak avangin season thara Champions League an khelh dawn leh dawn loh chu buaina a ni ta.
Hrem a nih avanga technical area-a awm phal loh Tottenham boss Mauricio Pochettino chuan, "Team ṭha tak Liverpool kha kan thunun zawk a, goal hnihna kan chhuah kha chu kan vanduai a ni," a ti.
Spurs manager chuan a eng zawnga thlirin, "Tumahin a tlawm zawk nih an duh ngai lo a, mahse zanin kan tlawm erawh Southampton leh Burnley laka kan tlawm ang kha a ni lo.
"Result lawmawm a ni hauh lo a, mahse kan tih theih chu kan hria a ni. Zanina kan khelh dan kha kan en chuan a sang pali zingah hian kan tel theih ka ring," tiin a sawi.