Federer-a'n nomawi 101 chawi ta

Roger Federer chuan a vawi li nan Miami Open nomawi a chawi ta. Federer hian champion lai John Isner chu 6-1, 6-4 a hnehin tennis a khelh hun chhunga title 101-na a la.

Keini huna Pathianni zan kha Florida, United States-ah chuan chhun nisat lai a ni a, kum 37 mi Federer-a'n Isner lakah inkhel a thunun hneh hle. Game hmasa berah a service chhuhsak nghalin set hmasa zawk hi minute 24 chhung lekin a la nghal.

Masters 1000 final a vawi 50 khelh niah Federer inkhel a hmuhnawm, a service aṭanga point hmuh theih 35 zinga 32 ngawt hmuin darkar khat leh minute thum chhung lekin hnehna a chang - Grand Slam dawta inelna ngaihhlut Masters 1000 bikah hian a vawi 28 nan a champion.

Federer a nghet
American tlangval Isner hian set hloh miah loin Miami Open final hi a lut a, mahse set a lak hnuhnung 10 zinga pakua ngawt chu tie break hmanga a lak a ni - final bikah set a la lo a, a khungpui Federer tan hna hautak a siamsak thei lo.

Miami Open seeded palina Federer-a'n hard court bikah a match hnuhnung panga zinga vawi li hnehna chang chungin final a hmachhawn thung a, set hmasa zawkah hian a service aṭanga point khat chauh hlohin talbuai lai a nei lo.

Seeded pasarihna Isner hi set hnihnaa 4-3 a hniam laiin a ke veilam hliam vangin enkawl a ngai a, 6ft 10in zeta sang hian khel chhunzawm thei mah se a dinhmun chhiat phah a, Federer nen an intawn vaw riat zingah ṭum rukah a chak lo zawkah a ṭang.

Federer a lawm
Tennis a kelh hun chhunga nomawi 101 chawi tawh Federer chuan, "He hmuna a inkhelh hmasak ber chu 1999 kha a ni a, tunah chuan 2019 a ni ta. Hun hmasa ber aṭanga season 20 a tlin hnua champion theih chu a hlu zual ngei mai.

"Nomawi 109 chawitu Jimmy Connors-a record hi ka um ngawr ngawr a ni lo a, ṭha taka ka khel a nih erawh chuan a thlen chin hi thlen ve theih a ni," a ti. Federer hi a kum tam deuh tawh mah se a taksa a la chak ṭha, vawi 17 winners vaw chhuakin heng zinga paruk chu backhand hmanga a neih a ni.

Kum 33 mi Isner chuan, "Game hmasa panga kan khelh lai khan chuan harsatna ka nei lo, a hnu lamah erawh kha chuan a ke veilam khan ngai a awh tawh lo. Ka chak lo a, a khaikhawmna awlsam tak chu Roger kha kei aiin a ṭha zawk a, khawvela a ṭha berte zinga mi a la ni reng," tiin a sawi.

Hmabak clay
Roger Federer hian season hnuhnung pahnihah clay court inelna a hmachhawn miah lo a, kuminah erawh clay-ah inkhelh ngei a tum. Australian Open an khelh zawh hnu khan Swiss star hian, "Clay-ah hlawhtlinna chan theih ka inbeisei," tiin a sawi tawh a ni.

Grand Slam vawi 20 champion tawh Federer hian a vanglai pawhin clay-ah hian result a nei ṭha tawk lo, French Open-ah Rafael Nadal a ngam loh avangin a champion thei lawk lo - mahse 2009 khan a champion a, major tournament paliah a champion kim.
French Open hi May 29 aṭangin Paris-ah khelh ṭan a ni leh dawn a, Federer hian inbuatsaih nan inelna dang a hmachhawn hmasak a ngai ang. Hliam vanga chawl lai Nadal chu Roland Garros inbuatsaih nan hian April 13 aṭanga khelh tur Monte Carlo Open-ah inlan ngei a tum, inelna hi April 21-ah zawh a ni ang.