Premier League-ah in chibai dawn lo

Premier League chuan inkhelh hmaa team leh official-te in chibai ṭhin chu coronavirus darh hlauh vangin tihtawp lailawk rih a ni dawn. Sorkarin coronavirus do na kawnga hma la tura a ngen hnuah Premier League hian thutlukna hi a siam.

Inkhelh hmain inhmachhawn turte team-te an intlar ang thoin an intlar ang a, in chibai loin an inkal pel thung ang. BBC-in a tarlan danin ram 87-ah coronavirus hi a darh tawh a, hri vei hi 90,000 chuang an awm tawh a ni.

Premier League hmahruaitu Liverpool chuan Anfield-ah mascot an neih rih loh tur thu an puang tawh a, an hnuaia thawkte coronavirus laka him lo ramah zin an phal lo. Southampton pawhin player-te chu fan-te autograph ziahsak bakah selfie lakpui a khap a, Newcastle manager Steve Bruce pawhin club chhungah an in chibai tawh lo thu a sawi. League One club Sunderland chuan March 21-22 a match awm loh karah player-te chu zin chhuak lo turin an hriattir tawh bawk.