Copa del Rey final a chiang ta

Spanish football-a inelna ngaihhlut hlawh Copa del Rey final khel tur a chiang ta a, April 18-ah Real Sociedad leh Athletic Bilbao chuan Spanish Cup champion nih an inchuh dawn. 

Sociedad hian semi-final inkhel pahnih belhkhawmah second division club Mirandes chu 3-1 in an lo hneh tawh a, Ningani zan inkhelah Granada chuan 2-1 in Athletic Bilbao hneh ve mahse inkhel pahnih belhkhawmah 2-2 a ni - away goal rule hmangin Bilbao an tlang. 

Granada muala second leg inkhelah mualneitu team hian Carlos Fernan-dez leh German Sanchez hmangin goal an khung a, hun rei zawk chu 2-0 in hma an hruai. Mahse, minute 81-naah Yuri Berchiche chuan Bilbao tan a rawn khung ve leh a, 2-1 in tlawm mah se a tlang zawkah an ṭang - inkhel hmasaah 1-0 in an lo chak tawh a, Granada-in khualmuala goal an khung loh an tuar ta a ni. 

Athletic Bilbao leh Real Sociedad hi Spain ram chhunga Basque Country an tiha mi ve ve an ni a, Copa del Rey final-ah kum 1927-a Basque team an intum hmasak ber tur a ni dawn.