James-a'n World Cup khel dawn lo

Season dang zawng aiin LeBron James chuan nipui chawlh a nei rei dawn a, American star-in chawlh a hman dan tur hi titi lian tak a tling. James hian FIBA Basketball World Cup khelh a tum loh thu a sawi.

Los Angeles Lakers hi NBA playoff khel turin an tling zo lo a, season danga playoff bakah NBA Finals khel ṭhin tan chuan regular season zawh ruala hun awl neih chu awm thiam pawh a har hial mai thei.

August 31 aṭanga September 15 chhunga neih tur World Cup chungchang sawiin James chuan, "Ka inlan lo ang, club leh ram hruaitu lam pawhin inlan lo turin inbiakina a awm tawh," a ti. June thla laihawl aṭang hian James inlanna tur film pakhat "Space Jam 2" chu an chang dawn.

Kum 34 mi James hian 2012 leh 2008 khan an ram United States chu Olympic-ah gold medal a lo lakpui tawh a, 2004 khan silver medal an hlawh chhuak bawk. Rio Olympic 2018-ah khan a inlan lo a, 2020 Tokyo Olympic-ah erawh a inlan mai thei niin a sawi. James chuan, "Coach Gregg Popo­vich-a'n min mamawh a, khel tura min duh a nih chuan khel thei ka ni, mahse hun a la rei avangin engmah sawi chian theih a la ni lo," tiin a sawi.