Pro Fight thutlukna a pangngai
LPS Pro Fight 2019 Lightweight Title Fight chungchang ngaihtuahin Thawhṭanni tlai khan LPS Pro Fight Organising Committee a ṭhukhawm a, thutlukna awm tawh sa chu thlak danglam ngai loah an ngai.
Lightweight Title Fight-ah champion lai Lalrinmawia (Govt. Complex) chuan round 5 an inhnek hnuin Vanlalawmpuia (Khuangthing) lakah Split Decision (48-47, 46-49, 48-47) in hnehna a chang. Result hian sawisel a hlawh a, a hmunah buaina a chhuah zui nghal bakah Khuangthing Welfare Committee chuan ennawn leh turin ngenna lehkha an theh lut bawk.
Pro Fight Organising Committee chuan inhnek video ennawn tur leh buaina chhuah dan zir chiang turin member panga awmna Study Group a din a, kar khat chhung hun pek niin anni hian an zir chian hnuah report an theh lut. Study Group report aṭangin mi thiam pasarih - International Referee & Judge pakhat leh National Referee & Judge parukin inhnek video an ennawn a, an zinga pathum hi Study Group member, Mizo national referee leh judge an ni a, a dang pali hi Mizoram pawn lam mi an ni. Video aṭanga inhnek entu mi pasarih zinga pali chuan chak zawka puan tawh Lalrinawma an chaktir a, mi pathumin Vanlalawmpuia an tichak a ni.
Study Group report aṭang hian Lightweight Title Fight hi inhnial theih tak a ni tih Organising Committee chuan a pawm a, amaherawhchu official-a result lo puan tawh chu pawm theihah a ngai a ni.