Tottenham chungah Arsenal

Arsenal chuan an mikhual Newcastle 2-0 a hnehin Premier League table-ah pathumna an ni a, khelh zat inangah an hmelma Tottenham Hotspur leh Manchester United te chungah an awm.

Thawhṭan zan Emirates Stadium-a inkhelah Gunners tan Aaron Ramsey leh Alexandre Lacazette ten goal an khung. Khelh hmabak pasarih la nei chungin Arsene Wenger chhuah hma season tluana an point hmuh zat (63points) an nei der tawh - Champions League khelh leh khelh loh chu an kuta innghat a ni.

Goal hnih
Arsenal player senior ber Ramsey-a'n corner aṭanga ball kal chu chiang zetin khung mah se, goal luh hma hian defender Sokratis Papastathopoulos-a'n Florian Lejeune a pawh avangin pawm sak a ni lo. Minute 30-naah box chhunga Lacazette ball lakluh chu Newcastle defender ten lo khak perin, ball per hi Welsh international Ramsey chuan laklawh nei miah loin yard 15 aṭangin a khung.

French striker Lacazette-a'n box chhunga ball a vir pui hnuah ṭha takin pet mah se Newcastle midfielder Matt Ritchie chuan goalline aṭangin a tauh chhuah sak a, Lyon player hlui hian bench aṭanga lut Pierre-Emerick Aubameyang hnen aṭanga a ball hmuh erawh a hlah nawn lo; keeper Martin Dubravka pet khumin an goal hnihna a pet lut.

Rafael Benitez nauten ball an chan tlem avangin hun ṭha sawi tur an ngah lo. Striker Salomon Rondon-a'n hnai tak aṭangin hun thawl hmu mah se Arsenal goalkeeper Bernd Leno a paltlang zo lo. 

Hei le Ozil
Goal a khung lo a, a ṭhiante goal khung tur siamsaktu a ni hek lo. Mahse, inkhelh banah Arsenal manager Unai Emery-a'n an midfielder Mesut Ozil chuan an duh leh mamawh ang taka a khelh chhuah thu a sawi. Tun hnaiah a hun laia Gunners player manto ber hi hlawh hnem ber a nih ang ngeiin a khel ṭha thei hle.

Newcastle lakah Ozil hian player thiam bik a nih zia a lantir a, a ṭhiante ball pe tura an khingpui kap kara a khung te (nutmeg), Lacazette-a um tur a siamsak dawna a awma ball a lakthlak te leh Alex Iwobi nen double 'one-two' an neih chu player dang tana tih harsa tak a ni - defender lu ti hai map tur khawpa backheel a neih leh Aubameyang nen an intlan thelh vel chu hmunnawm a tling.

Spanish manager Emery chuan, "Player tin khelh dan khan min ti lawm. Mesut khan a thiamna san zia a lantir nasa hle a, a mimal thiamna kha kan tana ṭhatpui tham a ni tih kan hmu leh ta. Inkhela kan ruahman dan leh duh ang takin a khel chhuak a ni," tiin Real Madrid midfielder hlui a dahsang hle.

Hmabak UCL
February thlatir khan chuan Arsenal hi Tottenham aiin point 10 zetin an hniam zawk a, tunah erawh an hmelma Spurs aiin point hnihin an sang ta. UCL ticket nei turin an dinhmun a ṭha rih a, chutih rualin an khelh hmabak pasarih zinga match nga hi khualmuala khelh tur a nih avangin a awlsam dawn lo.

Emirates Stadium chhunga Gunners fans awmkhawm chu ring taka au rualin, "Tottenham in lo en maw?" tiin hnehna an chan pahin an tihel a, December 1997 leh May 1998 inkara an lo tih tawh aṭangin an khelmuala league match vawi 10 an chak zawn chu an lawm nghal bawk a ni.

Gunners manager Emery chuan, "Spurs, Chelsea leh Manchester United ten hnehna an chang chho zel dawn, hei vang hian a sang pali zinga tel a awlsam dawn lo. Match lehpek a Everton nen kan inkhelh tur pawh a harsa ang, ngelnghet takin, rilru huaisen tak kan neih reng a ngai dawn a ni," tiin a sawi.