Volleyball inelna lian a hnai

Tualchhung volleyball inelna lian leh ngaihhlut ber Pro Volleyball League a hnai tawh a, April 16 aṭanga khelh ṭan tur niin kuminah chuan Suzuki Gixxer Pro Volleyball League tih a ni ang.

Inelna hi Hawla Indoor Stadium, Republic Vengthlangah neih a ni dawn, ruahmanna hmasa ang chuan March 20 aṭang khan R. Dengṭhuama Indoor Stadium, Mualpuiah khelh tur a ni. Mahse, Lok Shaba inthlan vangin a hmun thuah harsatna a awm a, a hun sawn a ngaih phah.

Mizoram Volleyball Association hnuaia inelna hi vawi li neihna tur niin, kuminah hian Ladies Pro Volleyball League, Junior Pro Volleyball League leh Men Pro Volleyball League a awm dawn a ni. Junior leh Men Pro Volleyball-ah team pasarih - Anastasia Electric Veng, Chanmari West, Chhinga Veng Spikers, Durtlang North, Hunthar, TNT leh Tuichangral an inel dawn a. Ladies Pro Volleyball-ah team pali - Bungkawn, Kanan, Bethlehem Vengthlang leh Durtlang an inel ve thung ang.

Club tin hian an team tichak turin state pawn player ṭha an la lut thei a, chutih rualin player paruk inkhel zingah hian vawi khatah state pawn player pakhat bak an tel thei dawn lo a ni. Team tel zawng zawng tan lawmman pawisa fai pek tur a nih bakah mi mal tiṭha lawmman chi hrang hrang sem a ni ang. Team tinin cheerleader an nei dawn a, a tiṭha ber hnenah lawmman pek a ni bawk ang a, club tin jersey hak tur pawh tualchhung ṭhui a ni ang.