Ronaldo lakah Allegri a hmanhmawh lo

Juventus coach Massimiliano Allegri chuan a player duhlai Cristiano Ronaldo chu chhawr hmanhmawh a tum loh thu a sawi a, Serie A lamah pawh a dam chian hma chuan a inlan a rinawm loh.

Real Madrid forward hlui Ronaldo hi Portugal tana a fehchhuahna lamah a malpui a hliam, hliam vang hian kar tawp khan league-ah pawh a inlan lo. Italian champion hian Napoli lakah point 15 ngawta hma an hruai fal tawh avangin thlamuang takin an awm thei riha ngaih a ni.

Kum 34 mi Ronaldo hi Atletico Madrid nen Champions League last 16 an khelh ṭuma a goal khung a lawm dan mawi lo avangin hrem a ni a, quarterfinal-a Ajax nen an inhmachhawnna hmasa zawkah a inlan thei dawn lo nia ngaih ni hman mah se pawisa chawitir bak hremna a hmachhawn lo.

Italian manager Allegri chuan, "Ronaldo hian nitin rim takin training a nei leh tawh, Thawṭanni khan a dinhmun endik nawn leh niin a ṭha tawh hle. Ajax nen kan inhmachhawn hunah pawh a inlan theih a rinawm, mahse a inkarah hun a la tam a, a dinhmun tak hi chiang taka kan ngaihchan phawt a ngai dawn a ni," a ti.

Juventus-in Ronaldo an lakluh chhan langsar tak chu Champions League nomawi an duh vang a ni. Harsa lutuk loin Ajax hi an paltlang thei tura ngaih a ni a, stage sang zawkah an mamawhna ala zual ang.