Katsumi-a'n a club hlui Bagan a chelh

Ningani zan khan Kolkata-ah Mohun Bagan leh Chennai City 1-1 in an inhnehtawk. Kalyani Stadium-ah Baba Diawara goal hmangin Mariners-in hma hruai mah se Chennai City-in Katsumi Yusa hmangin minute 67-naah an sut.

Japanese midfielder Katsumi tun hnaiah a khel ṭha hle. A club hlui Mohun Bagan a hmachhawn hma hian Aizawl FC nen an inhnehtawk ṭumin goal a khung a, Indian Arrows an hneh ṭumin goal a khung leh a, Mariners nena goal a khung hian match thum a zawnna a khungna chiah a ni.

Mariners hian point thum hlawh chhuak lo mah se I League table-ah erawh point 36 hmuin anmahni hnaih bertu Punjab FC aiin point 13-in an hmu tam zawk. Lalramchullova khelhna Bagan hian March 10, Thawhlehni zana Aizawl FC an hneh a nih chuan match li khelh hmabak nei chungin an champion dawn.

Pathianni hian I League match hnih a awm dawn. Tlai dar 5-ah Trau-in table mawngphaha awm Indian Arrows an mikhual ang a, zan dar 7:15-ah Churchill Brothers leh Gokulam Kerala te an inkhel ang.