Lewandowski thachhang- dawltu Zirkzee

Bayern Munich-in hliam vangin Robert Lewandowski an chhawr thei lo a, Polish striker tel loin Pathianni zan dar 8:00 hian Augsburg an mikhual dawn. Lewandowski awm lo hi Joshua Zirkzee tan hmingchherna hun ṭha a ni a, kum 18 mi Dutch forward hian ngaihven a hlawh sawt hle.

Bayern-in an goal khung khawl Lewandowski tel loin Hoffenheim 6-0 in an sawp a, hemi ṭum hian Zirkzee-a'n goal khat a khung. DFB Pokal quarterfinal-ah Zirkzee hi bench-ah dah a ni a, Bayern goal nawr a na tawk lo. Augsburg nen hian 6ft 4in-a sang striker hi bul ṭan ngei tura ngaih a ni.

Dutch striker Zirkzee hian Bayern tan vawi li chauh a la khel chungin goal thum a khung tawh a, Real Madrid nen sawi zawm a ni a. Lewandowski thachhangdawltu Zirkzee hi an ram Netherlands pawhin senior team-a khel turin an koh thuai rin a ni a, Bundesliga-ah hming a chher chho ṭan mek.

Inhliam vanga harsatna nei Bayern Munich an dam chho ṭan a, Javi Martinez leh Lucas Hernandez ten training an zawm thei tawh a. German defender Niklas Sule-a'n training-naah ball khawih ṭan leh tawhin Ivan Perisic pawh a dam hnai. Amaherawhchu Augsburg nen erawh Hansi Flick-a'n inhliam inenkawl mekte hi a chhawr theih a rinawm loh.

Zanin dar 11:00 hian Borussia Dortmund-in Borussia Monchengladbach an tlawh dawn. Erling Braut Haaland a awm meuh chuan Dortmund pawh pathumnaah an awm tawh a, Bayern nen an inthlauhna point li chauh a nih avangin Bundesliga nomawi inchuh boruak a sang hle.

Zanin Inkhel Tur

Bayer Leverkusen    8:00 PM    Eintracht Frankfurt

Wolfsburg    8:00 PM    RB Leipzig

Hertha BSC    8:00 PM    Werder Bremen

Freiburg    8:00 PM    Union Berlin

Schalke 04    8:00 PM    Hoffenheim

Borussia M'gladbach    11:00 PM    Borussia Dortmund

March 8, Pathianni

Bayern Munich    8:00 PM    Augsburg

Mainz 05    10:30 PM    Fortuna Dusseldorf