Pathianni zan dar 10-ah Manchester Derby
Manchester United-in Pathianni zan dar 10:00 hian Old Trafford-ah Manchester City an mikhual dawn. Ole Gunnar Solskjaer hote tan season thara Champions League khel turin an hmelma Man City hi hneh ngei a ṭul a, Pep Guardiola hote tan erawh inrintawkna neih nan hmelma hneh a ṭul thung.
Premier League-ah Liverpool an fal avangin champion inum boruak a dai tawh a, Champions League khelh tum inchuh erawh a la nung ṭha hle. Panganaa awm United-in palina Chelsea leh pathumna Leicester City chu point thum leh point riatin an pha lo.
Solskjaer vs Pep
Pep Guardiola hnuaiah Manchester City-in Premier League nomawi vawi hnih an chawi tawh a, an sulhnu thlirin Ole Gunnar Solskjaer nen khaikhin rual a ni lo. Amaherawhchu an intawn tawhnaah erawh Solskjaer hi Spanish manager lakah a record a ṭha.
Nikum December 7 khan Solskjaer-a hoten Etihad Stadium an luhchhuah a, 2-1 in hnehna an chang. United point thum hlu tak hi Man City tan erawh nomawi beiseina thamral tirtu zinga mi a ni. League Cup semifinal-ah Pep-a hoten phuba lain Old Trafford-ah 3-1 in hnehna an chang. Guardiola hote an chungnung viauin lang mah se Etihad Stadium-a second leg an khelhah erawh United-in 1-0 in hnehna an chang. Solskjaer-a hote goal khata an chak avangin final thleng zo lo mah se an intawn hnuhnun bera hnehna an chan avangin Pathianni zanah inrintawkna a neih phah ang.
En châkawm
Bruno Fernandes an neih hnuah Man United inkhel a nung chho a, January thlaa an lakluh Odion Ighalo hmangin an goal nawr a na sawt bawk. Solskjaer-a'n hliam vangin Marcus Rashford leh Paul Pogba la chhawr thei lo mah se Anthony Martial leh Scott McTominay ten ngai an awh leh tawh a, inhliam tenau vanga FA Cup-a inlan lo Harry Maguire, Aaron Wan-Bissaka leh Dan James te chhawr theih hman a beiseiawm bawk.
Manchester United-in an phur vanglai takin tun hnaia English club ṭha bera chhal ngam Man City an hmachhawn dawn a, fiahna hautak hi en a châkawm takzet. Pep Guardiola hote hian nomawi chawi theih hmasa ber League Cup-ah an champion a, FA Cup leh Champions League-ah nomawi chawi thei zingah an tel. Man City hi match nga a zawnin an chak tawh.
Man City tana chanchin duhawm lo erawh Kevin De Bruyne chu hliam vangin derby-ah inlan lo thei dinhmunah a ding. Chutihrualin Man City squad a chhah ṭha tih hriat a ṭha a, League Cup final-a che ṭha Phil Foden chu FA Cup-ah bench-ah a ṭhu tluan. Pep hian Foden bakah hian tawnhriat ngah zawk David Silva leh Bernardo Silva te a kawl bawk a, United nen an inkhelh hunah midfield inbeihna a hmuhnawm ang.
Zanin Inkhel Tur
Liverpool 6:00 PM AFC Bournemouth
Arsenal 8:30 PM West Ham United
Crystal Palace 8:30 PM Watford
Sheffield United 8:30 PM Norwich City
Southampton 8:30 PM Newcastle United
Wolverhampton Wanderers 8:30 PM Brighton & Hove Albion
Burnley 11:00 PM Tottenham Hotspur
March 8, Pathianni
Chelsea 7:30 PM Everton
Manchester United 10:00 PM Manchester City
March 9, ThawhṬanni Zan
Leicester City 1:30 AM Aston Villa