United tan Ighalo a langsar

Manchester United chuan FA Cup last 16-ah Derby County 3-0 in an hneh a, Ningani zan inkhelah hian Luke Shaw-a'n goal hmahruai a khung hnuah Odion Ighalo-a'n goal hnih a khung. 

Ole Gunnar Solskjaer hote hian quarterfinal-ah Tottenham Hotspur hnehtu Norwich City an hmachhawn dawn. FA Cup-a club pariat la damte hi Premier League club vek an ni a, hetiang hi ṭum nga a thlenna chauh a ni.

Pride Park Stadium-ah Wayne Rooney telna Derby County-in United tlarhnung rum ṭhaih nghal mah se team ṭha zawk Solskjaer hote an tlo.

United defender Luke Shaw-a'n minute 33-naah ṭha zetin a volley a, Jesse Lingard hnung a fuh hnuah goal-ah a kum lut. Minute 41-naah Nigerian striker Odion Ighalo-a'n box chhungah rilru fim takin United goal hnihna a khung.

Second half-ah Ighalo-a'n United ṭantute lawmna a siam nawn. Watford striker hlui hian Juan Mata-a cross chu goal-ah a pet nghal a, Derby player-te'n dang mah se a per chu kawh zetin a pet lut.

United manager Ole Gunnar Solskjaer chuan, "Striker tan inrintawkna a pawimawh a, an hlim a ṭul bawk. Ighalo hian hliam nei chungin min rawn zawm a, chutichung chuan kan chang hi kan lawm hle. Amah hi kan neih loh striker a ni a, kan mamawh tak a ni," tiin a fak hle.

United tana goal hnih khungtu Odion Ighalo chuan, "Ka khelhpuite, manager-te leh min ṭantuten min rin phawt chuan midang min sawi hi chu ka ngai pawimawh lo," tiin media sawiselna a ngai pawimawh loh thu a sawi.

FA Cup

March 5, Ningani

Derby County    0 - 3    Manchester United

MANU : Luke Shaw 33'; Odion Ighalo 41', 70'

Quarterfinal Fixtures

Sheffield United    Vs    Arsenal

Newcastle United    Vs    Manchester City

Leicester City    Vs    Chelsea

Norwich City    Vs    Manchester United

Note : March 20-22 hian quarterfinal khelh a ni ang.