Spain an chak hram

World Cup 2022 qualifier-a hnehna chang turin Spain-in vanneihna an mamawh tel a, an mikhualna ramah team ṭha zinga chhiar tel ni ngai lo Georgia chu hun pek belha Dani Olmo-a goal hmangin 2-1 in an hneh hram.

Spain-in inkhel thunun mah se goal an chhuah hmasa a, Russian Premier League club Rubin Kazan winger Khvicha Kvaratskhelia chuan minute 43-naah goal hmahruai a rawn khung.

Kum 28 chhung World Cup qualifying match-a la tlawm ngai lo Spain an hawihai. Mahse, Spain-in hnufual reng an tum lo - Manchester City forward Ferran Torres chuan minute 56-naah si phurh a rawn sut.

Spain-in beisei angin goal dang an khung lawk thei lo a, Georgia laka draw result chu an tan result mualpho thlak a ni - mahse, hun pek belh minute hnihnaah Olmo-a inlar a, kum 22 mi forward hian chakna goal-a rawn khung.

Georgia midfielder Levan Shengelia chu hun tawp ham rik a rik hma hretin hnawhchhuah a ni bawk a, chak zo lo tur anga lang hman Spain-in vanneihna chharin an chak hram.

Group B inkhel dangah Sweden chuan 3-0 in Kosovo an sawp bawk a, Ludwig Augustinsson, Alexander Isak leh Sebastian Larsson (penalty)-ten goal khat ṭheuh an khung a, hun pek belhah Kosovo forward Bernard Berisha chu hnawhchhuah a ni.

AC Milan striker Zlatan Ibrahimovic chuan inkhel bul a ṭan a, mahse, Sweden tana inkhel tura a kir leh hnuah striker ropui hian goal-a la khung leh rih lo.

Group B Results

Georgia 1 - 2 Spain

GEO: Khvicha Kvaratskhelia 43'

SPA: Ferran Torres 56'; Dani Olmo 90+2'

Kosovo 0 - 3 Sweden

SWE: Ludwig Augustinsson 12'; Alexander Isak 35'; Sebastian Larsson 70' (P)