MotoGP Qatar thlalerah Vinales a chak

Bike intlansiakna sang ber MotoGP chu 2021 season atan tlan ṭan a ni leh ta. Inelna hmasa ber Qatar Grand Prix-ah Maverick Vinales chuan hnehna a chang a, champion lai Joan Mir chu dawhsanah (podium) a lawn phak lo.

Hliam vangin Marc Marquez a la inlan thei lo a, legend Valentino Rossi-a'n Petronas Yamaha nena a season hman hmasakah duhthusam result a nei lo - Italian star hi 12-naah a thleng hram.

Pakhatna Vinales

Pathianni zan Qatar thlalera intlansiakah Vinales-a'n lap riat chauh tlan hmabak awm tawh tihah a hmasa ber aṭanga tlan ṭan Francesco Bagnaia chu a tlan pel a, bike intlansiakna sang berah hian a vawi kua nan hnehna a chang.

Yamaha rider Vinales chuan, "A tir lamah bul ka ṭan fuh tawk lo a, hnehna chan beiseina pawh a hniam hman hle. Mahse a pumpuia thlir chuan intlansiak ṭha tak a ni, kar tawp hlimawm tak ka hmang thei hi ka lawm," a ti.

Champion lai Mir-a'n 10-na aṭangin inelna a hmachhawn ṭan a, tlan ṭha viau mah se lap hnuhnung berah Johann Zarco leh Bagnaia te a tluk loh avangin pathumnaah a lungawi a ṭul - season bul ṭanna ṭha pangngai tak erawh a ni phak.

Rossi chhehvel

Rossi-a'n Petronas Yamaha team nen chona thar a hmachhawn a, intlansiak tir lamah pasarihna dinhmun hial a luah hman. Mahse, kum 42 mi Rossi hian bike ke (tyre) a thlang fuh tawk lo niin a lang, zawi muangin a tawlh hnung hret hret, a tawpah chuan a sang zual 10 zingah a tel phak lo.

MotoGP vawi sarih champion tawh Rossi chuan, "Qualifying lamah kan che ṭha thawkhat, kha vang khan tun aia dinhmun ṭha zawk luah kha chu kan beisei. Mahse tyre lamah harsatna ka nei. Qualifying hmasa lamah hetiang harsatna pawh hi a lo thleng tawh.

"Kan chingfelah kan ngai a, inelna neih niah boruak a vawt leh deuh hret a, kan tum leh duh ang takin thil a kal vek thei ta bik lo a ni," tiin a sawi. Rossi hi a kum tam deuh tawh mah se, hliam nei loa a tlan tluan chuan elpui hautak a ni phak ang.

Marquez awm lohna

Season hmasa khan Jerez tlankawngah inelna hmasa ber an nei a, hemi ṭum hian Marquez chesualin a ban ruh zai a ngai hial. Rei vak loah lo kir leh mai tura ngaih a ni, mahse season tluana a inlan loh bakah kuminah pawh bul a ṭan thei lo.

Tun season hian MotoGP calendar pangngai angin tlan a ni leh tawh dawn, Qatar-ah hian inelna hmasa an nei ang. A hmasa pahnihah a inlan thei lo a nih pawhih Marquez hi pathumna aṭang chuan a inlan theih a beiseiawm.

Hri lengin a tibuai lo a nih chuan intlansiak vawi 19 a awm dawn tihna a ni a, nikuma vawi 14 an tlan nen chuan a inthlau dawn. A tir lamah inlan lo mah se Marquez tan pawh title beiseina a la awm thei dawn tihna a ni.